Թուրքիան հայտարարել է 56 սիրիացի զինծառայողի մահվան մասին (տեսանյութ)

Փետրվարի 28-ին թուրք զինվորականները Սիրիայի հյուսիս-արևմուտքում «չեզոքացրել» են սիրիական կառավարական բանակի 56 մարտիկի: Այս մասին հայտնում է «Անադոլու» գործակալությունը՝ Թուրքիայի ազգային պաշտպանության նախարարության հայտարարությանը հղումով:

Նախարարության տվյալներով՝ «ոչնչացվել է հակառակորդի 8 տանկ, 4 զրահամեքենա, 5 հաուբից և 2 հրթիռային կայանք»:

Ինչպես ավելի վաղ տեղեկացրել էր Tert.am-ը, հինգշաբթի երեկոյան թուրքական բանակը սկսել է ցամաքային և օդային հարվածներ հասցնել սիրիական բանակի դիրքերի ուղղությամբ:

«Россия-24» հեռուստաալիքը հայտնել է, որ Սիրիայի Իդլիբ նահանգում թուրք զինվորականներն ու ընդդիմադիր գրոհայինները կրակ են բացել սիրիական և ռուսական օդուժի ուղղությամբ՝ փորձելով խոցել ռազմական ինքնաթիռները:

Թուրքիայի Հաթայ նահանգի նահանգապետ Ռահմի Դողանը երեկ հայտարարել է, որ Սիրիայի կառավարական ուժերի օդային հարվածների հետևանքով թուրքական զինված ուժերը 33 զոհ և 32 վիրավոր ունի:

Իրավիճակն Իդլիբում շարունակում է ծայրահեղ լարված մնալ: