Գործարարը ներկրել է կանեփի սերմացու, ցանել, Ոստիկանության հետ պայմանագիր կնքել, որ հսկեն, և երբ հավաքել են բերքը, Ոստիկանությունն առգրավել է այն. (տեսանյութ)

Ամիսներ առաջ բարձրացրի ներդրողներ հետ կապված խնդիրներ, որ տարբեր խոչընդոտների են հանդիպում և վարչապետը խոստացավ պատժել խոչընդոտողներին: Այս մասին այսօր Ազգային ժողովում կառավարության հետ հարց ու պատասխանի ժամանակ ասաց «Լուսավոր Հայաստան» խմբակցության պատգամավոր Գևորգ Գորգիսյանը:

«Ուզում եմ ներկայացնել հերթական ներդրողի ոդիսականը, ներդրողը 2019 թվականի մայիսին Կառավարությանն էր ներկայացրել 7-ամյա բիզնես ծրագիր և խոսքը վերաբերում էր տեխնիկական կանեփի ցանքին, որին թույլտվությունը Կառավարությունից ստացել էր: Նշեմ, որ այդ կանեփում 0,3 տոկոս է պարունակում հոգեմետ նյութը և չի համարվում թմրամիջոց: Կառավարությունը տվել էր համաձայնություն, ներդրողը 170 հազար դոլարի սերմացու է տվել, բերել է, ցանել է, Ոստիկանության հետ կնքել է 24-ժամյա պահպանության պայմանագիր, որպեսզի այդ մեկ հեկտար ակտը պահպանեն և երբ եկել է արտադրանքը հավաքելու փուլը, որից նախատեսվում էր տեղում կազմակերպել օրինակ՝ բուսական յուղի արտադրություն, մանրաթելերի արտադրություն, և երբ հավաքել են ամբողջ ցանածը, ոստիկանությունը եկել է և առգրավել է, այն Ոստիկանությունը, որ մի քանի ամիս այդ տարածքը պահպանել է»,-ասաց նա:

Գևորգ Գորգիսյանը նշեց, որ ամիսներ շարունակ այս գործարարը չի կարողանում Կառավարությունից որևէ պատասխան ստանալ, թե ինչ անի և դիմել է իրեն: «Ուզում եմ հասկանալ, թե ինչ անի այս գործարարը քանի որ Ամերիկայի իր գործընկերները սպասում են պատասխանի: Մոտ 400 հազար դոլարի ներդրում է կատարել և հիմա անորոշ վիճակում է մնացել»,-ասաց նա:

Հարցին արձագանքեց փոխվարչապետ Տիգրան Ավինյանը, ով նշեց, որ տվյալ ներդրողը կառավարությունից որևէ համաձայնություն նմանատիպ գործունեություն իրականացնելու համար չի ստացել և չի կարող ստանալ, քանի որ Կառավարության որոշման համաձայն կանեփի բոլոր տեսակների արտադրությունը ՀՀ-ում արգելված է: Նա նշեց, ոչ տեխնիկական կանեփը որոշ երկրներում արգելված չէ և նման քննարկումներ սկսել է նաև Հայաստանում և Էկոնոմիկայի նախարարությունը վերլուծությունը կտա, թե նման կանեփի արտադրությունը ինչ հնարավորություններ է տալիս, և որ երկրներում ինչ կարգավորումներ կան:

«Պարոն Գորգիսյան, ներդրումների չափի հետ կապված վստահեցնում եմ, որ այն թվերը, որոնք դուք հնչեցնում եք ուղղակի գերչափազանցված են, որևէ կերպ փաստարկված չեն: Այնուամենայնիվ էկոնոմիկայի նախարարության վերլուծությունից հետո մենք մեր վերաբերմունքը կկարողանանք արտահայտել, դրանից հետո արդեն կհետևի տվյալ ներդրողի խնդրի հանգուցալուծումը այս կամ այն կերպ»,-ասաց նա:

Գևորգ Գորգիսյանը նշեց, որ փաստորեն փոխվարչապետը պնդում է, որ առանց Կառավարության թույլտվության հնարավոր է ներկրել սերմացու, մեկ հեկտար տարածք ցանք կազմակերպել, առանց Կառավարության իմացության ոստիկանության հետ պայմանագիր կնքել, որ այդ արտը 24-ժամյա հսկողություն ունենա:

«Եթե դա այդպես է, ուրեմն առաջին հերթին պետք է համապատասխան կառույցների ղեկավարներին աշխատանքից հեռացնել, նոր քննարկումները իրականացնել: Ո՞նց է հնարավոր, որ դա ներմուծվել, ցանվել, քաղվել է Կառավարությունը ոչինչ չի ձեռնարկել և վերջին պահին եկել առգրավել է»,-ասաց նա:

Տիգրան Ավինյանը նշեց, որ մատնանշած կառույցի ղեկավարը արդեն նախկին ղեկավար է և չի աշխատում: Նա նշեց, որ գուցե հնարավոր է Հայաստանում ներմուծել, քանի որ ներմուծումը կարգավորումներով չի արգելվում, բայց աճեցումն արգելվում է և դրա համար որևէ համաձայնություն Կառավարության հետ չէր կարող լինել: