«Արդյունքները չեն արտացոլում ժողովրդի կամքը». Ադրբեջանի ընդդիմադիր կուսակցությունը պահանջում է չեղարկել ընտրությունների արդյունքները

 Ադրբեջանական ընդդիմադիր «Մուսավաթ» կուսակցությունը հայտարարություն է տարածել, որում ասված է, որ փետրվարի 9-ին Ադրբեջանում կայացած արտահերթ խորհրդարանական ընտրություններն անցել են ժողովրդավարական նախընտրական միջավայրի, համապատասխան իրավական հիմքի և հավասար քաղաքական պայքարի բացակայության պայմաններում: Այս մասին տեղեկացնում է turan.az կայքը:

«Արտահերթ ընտրությունների անցկացման պատճառները հստակ չեն բացատրվել, և այն պատճառով, որ դրանք արտահերթ էին և նշանակվել էին հանկարծակի` քաղաքական կուսակցություններն ու հասարակությունը չէին հասցրել պատրաստվել այդ ընտրություններին»,- ասվում է հայտարարության մեջ:

Ընդդիմության և միջազգային մարմինների կողմից ընտրական բարեփոխումների վերաբերյալ առաջարկությունները չեն քննարկվել:

«Քվեարկությունն ու ձայների հաշվարկն ուղեկցվել են զանգվածային խախտումներով: Ադրբեջանի խորհրդարանական ընտրություններն ազատ և արդար չեն եղել, իսկ հրապարակված արդյունքները չեն արտացոլում ժողովրդի կամքը: Կեղծիքների միջոցով ձևավորված Միլլի Մեջլիսը չի կարող կատարել Ադրբեջանի Հանրապետության օրենսդիր մարմնի լիազորությունները»,- ասվում է հայտարարության մեջ:

«Մուսավաթ» կուսակցությունը պահանջում է.

1. չեղարկել փետրվարի 9-ի ընտրությունների արդյունքները,

2. երկրում իրական քաղաքական բարեփոխումներ անել,

3. ստեղծել ժողովրդավարական նախընտրական պայմաններ,

4. ապահովել հիմնարար ազատություն,

5. անհապաղ ազատ արձակել քաղբանտարկյալներին,

6. փոփոխել Ընտրական օրենսգիրքը ՝ հաշվի առնելով ընդդիմության և միջազգային կազմակերպությունների առաջարկությունները,

7. ստեղծել հավասար քաղաքական մրցակցության պայմաններ:

Փաստաթղթի վերջաբանում կուսակցությունը պահանջել է նոր ընտրությունների անցկացում:

Ադրբեջանում արտահերթ ընտրությունները տեղի են ունեցել փետրվարի 9-ին: Ընտրություններին մասնակցությունը կազմել Է 47,81 տոկոս: Ադրբեջանի Կենտրոնական ընտրական հանձնաժողովը հրապարակել Է խորհրդարանական ընտրությունների նախնական արդյունքները, որոնք ստացվել են բոլոր 125 ընտրատարածքներից, ըստ որոնց «Նոր Ադրբեջան» իշխող կուսակցությունը շուրջ 70 տեղ է ստանում նոր խորհրդարանում: