Ասենք դեմ եղանք սահմանադրական փոփոխություններին, պիտի հարձակվե՞ն մեզ վրա, վառե՞ն մեր մեքենաները, սա՞ է ձեր երազած ժողովրդավարությունը. Էդմոն Մարուքյանը՝ Փաշինյանին (տեսանյութ)
Սահմանադրության փոփոխությունների նախագիծը չի կարող այս ձևով գնալ հանրաքվեի, որովհետև արդեն բացատրվել է, թե մերժումից հետո ինչ է լինում: ԱԺ ամբիոնից Սահմանադրական փոփոխությունների հանրաքվեի մասին որոշման նախագծի քննարկմանն հայտարարեց «Լուսավոր Հայաստան» խմբակցության ղեկավար Էդմոն Մարուքյանը` նշելով, որ ընթացակարգն է սխալ տարվում: «Արդեն բազմաթիվ ընթացակարգեր խախտված են, բայց դա էական չէ, խնդիրն արդեն դրված է, ներկայացված է»,- ասաց նա:
Էդմոն Մարուքյանը երկու խնդրի արձագանքեց: Նա նշեց, որ ուշադրությամբ լսել է վարչապետի ելույթը, որի մի ամբողջ հատված ՍԴ դատավոր Վահե Գրիգորյանի «մեծ նամակից էր», որտեղ նկարագրվում էր` ինչպես էր ձևավորվել Սահմանադրական դատարանի նախագահ Հրայր Թովմասյանի նախագահությունը:
«Այդ հատվածը հայտնի քրեական գործից է, որը հարուցված է ԱԺ նախկին նախագահի նկատմամբ և ԱԺ աշխատակազմի նախկին նախագահի նկատմամբ: Դա էլ պարզ է, բոլորիս հայտն է: Բայց ինձ մոտ հարց առաջացավ, որ եթե դատավորներ կան, որոնք նշանակված են Լևոն Տեր-Պետրոսյանի կողմից կամ հետո այլ նախագահների կողմից, ուրեմն նրանք չպե՞տք է պաշտոնավարեն: Սա կարծում եմ, սխալ տրամաբանություն է, որովհետև այն մարմինները, որոնք պետք է լինեն Սահմանադրության անկախ մարմիններ, նրանք պետք է մնան տարբեր ժամանակներում պաշտոնավարող անկախ դատավորներ` տարբեր իշխանությունների կողմից նշանակված»,-ասաց նա:
Պատգամավորը մատնանշեց, որ առաջին ատյանի, Վերաքննիչ, Վճռաբեկ դատարաններում աշխատում են հարյուրավոր դատավորներ, որոնք նշանակվել են Սերժ Սարգսյանի, Ռոբերտ Քոչարյանի, Լևոն Տեր-Պետրոսյանի օրոք: «Այսինքն` այս տրամաբանությունը կարելի է կիրառել նաև ընդհանուր իրավասության բոլոր դատարանների վրա, եթե համաձայն չէ երկրի ղեկավարը և ասում է, որ այնտեղ կան դատավորներ, որոնք նշանակված են նախկին երեք նախագահների կողմից,- ասաց նա, ապա ավելացրեց,- Սահմանադրական և անկախ մարմինների իմաստը նաև այն է, որ տարբեր ժամանակներում նշանակվում են տարբեր իշխանությունների կողմից, ինչը ևս որոշակի անկախության երաշխիք է եղել»:
Էդմոն Մարուքյանը նշեց, որ այդ ամենից զատ, իրեն ամենաշատը անհանգստացնում է մեկ այլ հանգամանք: «Ինձ վտանգավոր է թվում Ձեր այն մոտեցումը, որ Դուք ի սկզբանե այս ամբիոնից սպառնում եք մեզ, այն ուժերին, որոնք կարող են իրավական ճանապարհով վիճարկել այսօրվա որոշումները,- ասաց նա` բառացի ցիտելով վարչապետի խոսքերը,- փաստորեն Դուք եք որոշում` ովքեր են հակապետական ուժերը, ովքեր են ազգի նվիրյալները: Մենք այս ո՞ւր ենք գնում, պարոն վարչապետ: Սա՞ է Ձեր երազած ժողովրդավարությունը: Այո՞: Ձեր երազած ժողովրդավարությունն այն է, որ գործադիր իշխանության ղեկավարը կարող է հայտարարել ազգի թշնամիներին և ազգ բարեկամների՞ն, նվիրյալների՞ն: Կարող է սրբեր կարգել, կարող է դավաճաններ կարգել, անիծյալներ կարգել, սատանաներ օրհնել: Սա ի՞նչ քաղաքականություն է, պարո՛ն վարչապետ: Ժողովրդավարությո՞ւն է սա կոչվում»,- ասաց նա:
Էդմոն Մարուքյանը մատնանշեց` ժողովրդավարությունը սահմանափակված է այն մարդկանց իրավունքներով ու ազատություններով, որոնք համաձայն չեն, և դա կարող են տարբեր նկատառումներով համաձայն չլինել օրվա իշխանությունների հետ: «Եվ քանի դեռ մենք պառլամենտում ենք, թույլ չենք տա, որ գործադիր մարմնի որևէ ղեկավար մատ թափ տա պառլամենտի վրա,- ասաց նա, ապա հարց բարձրացրեց,- Պարո՛ն վարչապետ, իսկ եթե այդ ուժերը, համաձայն չլինելով այդ հանրաքվեի հետ, իրավական ճանապարհով, ասեն, որ պետք է գործողություններ անենք: Ի՞նչ պետք է անեն: Պետք է գան, վառե՞ն մեր մեքենաները, հարձակվե՞ն մեզ վրա: Ի՞նչ պետք է անեք դուք: Փոխանակ ասեք, որ ով համաձայն չէ, պետությունը կապահովի նրանց անհամաձայնությունը ժողովրդավարությամբ արտահայտելու իրավունքը, ասում եք` ով համաձայն չէ, նրանց կհայտարարենք հակապետական տարրեր, իսկ ով համաձայն է, մենք կհայտարարենք ազգի նվիրյալներ: Մեղքերի թողություն էլ տվեք, թող գնան էլի»:
Դիմելով վարչապետին` նա ասաց. «Ամենայն հարգանքով, սա ճանապարհ չէ, սա տարբերակ չէ, այս մոտեցումներ մեզ վատ տեղ են տանում»:
Էդմոն Մարուքյանը նաև նշեց, որ կարող էին վարչապետի ելույթը էմոցիոնալ դիտարկել, բայց չենք կարող դա անել, վարչապետը հաստատում է իր խոսքերը:
«Ես էլ ասում եմ` ոչ ոք ՀՀ քաղաքացուն` կապույտ անձնագրով մարդուն, չի կարող հռչակել հակապետական ուժ, ո՛չ ոք: Ուզում է 90 տոկոս ձայն ստանաք: Մեկ մարդ էլ համաձայն չլինի, ես պատրաստ եմ այդ մարդու կողքը կանգնել: Ոչ ոք չփորձի այս տեղը «պալիտ բյուրո» դարձնել: Սա «պալիտ բյուրո» չի դառնա: Սուպերվարչապետական համակարգը փաստորեն մեր երազածն էր, Սահմանադրական դատարանը մեր երազածը չէր, պետք է փոխենք»,- ասաց նա:
Էդմոն Մարուքյանը նշեց, որ իրենց խմբակցությունը դեմ է քվեարկելու նախագծին և սատարելու են բոլոր այն մարդկանց, որոնք դեմ են դրան: «Ոչ ոք չի կարող անեծքներով մեզ փորձել շանտաժի ենթարկել:Անեծքները իրավական պետությունում սահմանադրաիրավական կատեգորիա չեն, իսկ ովքեր պետական դավաճաններ են, դավաճաններ կլինեն դատարանի վճռով»,- ասաց նա:
Օրինազանց վարորդները հայտնաբերվել են, մեքենաները՝ տեղափոխվել պահպանվող հատուկ տարածք
Ռոմանոս Պետրոսյանը լուսանկարներ է հրապարակել ՀԷՑ-ի բաշխման ցանցի տրանսֆորմատորային ենթակայաններից
Ղարաբաղից տեղահանվածները պետք է կապեն իրենց ապագան Հայաստանի հետ
Առանց ռուսական նավթի, երբ մոտ է վառելիքի գլոբալ դեֆիցիտը
Մակրոնը ոչ մի բառով չի դատապարտել Իսրայել-ԱՄՆ Իրանի դեմ պատերազմը. Արաղչի
Էնցո Ֆերնանդեսը ցանկանում է հեռանալ Չելսիից
Մենք ուզում ենք, որ դուք օր առաջ տնավորվեք ՀՀ-ում
Թեհրանի կողմից ԱՄՆ-ի վրա հարձակման վերաբերյալ որևէ հավաստի հետախուզական տվյալ չի եղել
Հայաստանը՝ միջազգային տեխնոլոգիական համագործակցության նոր հարթակ․ CTBTO-ն առաջին անգամ տարածաշրջանայ...
Ամբերդ ամրոց և Քարի լիճ տանող ավտոճանապարհները փակ են