Ադրբեջանի նոր խորհրդարանում մեծամասնություն կկազմի իշխանական կուսակցությունը

«Նոր Ադրբեջան» ("Yeni Azerbaycan") կուսակցությունը փետրվարի 9-ին տեղի ունենալիք արտահերթ խորհրդարանական ընտրությունների արդյունքում ձայների մեծամասնությունը կստանա, հայտնում է Minval.az կայքը` հղում տալով S&P Global Ratings միջազգային գործակալության վերլուծաբանների հայտարարությանը:

«Անցած մի քանի ամիսների ընթացքում Ադրբեջանում մի քանի քաղաքական իրադարձություններ են տեղի ունեցել. նախագահ Իլհամ Ալիևը փոխել է վարչապետին, վերակազմավորել է կառավարության կառուցվածքը, և լուծարել է երկրի խորհրդարանը: Արտահերթ խորհրդարանական ընտրությունները նշանակվել են փետրվարի 9-ին: Մենք ակնկալում ենք, որ նոր խորհրդարանում, ամենայն հավանականությամբ, կգերիշխի իշխող «Նոր Ադրբեջան» ("Yeni Azerbaycan") կուսակցությունը, չնայած որ դրա կազմում մի քանի նոր անդամներ նույնպես կլինեն»,- կարծում են գործակալության վերլուծաբանները:

Նշվում է, որ կառավարության կառուցվածքի փոփոխությունը և խորհրդարանի լուծարումը նախաձեռնվել են կառուցվածքային բարեփոխումներ իրականացնելու և տնտեսության դիվերսիֆիկացման համար: «Սակայն, նոր կառավարության և խորհրդարանի արդյունավետությունը ժամանակի ընթացքում կստուգվի»,- ասվում է զեկույցում:

Զեկուցում նաև խոսվում է ղարաբաղյան հակամարտության անորոշության հետ կապված պահպանվող աշխարհաքաղաքական ռիսկերի մասին:

«Մենք լայնամասշտաբ հակամարտության ավելի արագ էսկալացիա չենք սպասում: Սակայն նախկինի պես կարծում ենք, որ դրա լուծման հեռանկարները մոտ չեն` հաշվի առնելով այս հարցի վերաբերյալ կողմերի հակադիր կարծիքները»,- ասվում է հաղորդագրության մեջ: