Սոցհարցում Թուրքիայում. ո՞ւմ կընտրեիք երկրի նախագահ

Թուրքական «Artıbir» սոցհետազոտությունների կենտրոնը ուսումնասիրություն է իրականացրել` պարզելու, թե Թուրքիայի քաղաքացիները նախագահական ընտրությունների ժամանակ քաղաքական գործչիցներից ում են նախընտրում ձայն տալ:

Սոցհարցման մասնակիցներին տրվել է հետևյալ հարցը. «Եթե այս շաբաթ տեղի ունենան նախագահական ընտրություններ, ո՞ւմ կտաք ձեր ձայնը»:

Հարցման մասնակիցների 45.4 տոկոսը պատասխանել է, որ կքվեարկի Թուրքիայի ներկայիս նախագահ Ռեջեփ Թայիփ Էրդողանի, իսկ 34.6 տոկոսը նախապատվությունը տվել է Ստամբուլի գործող քաղաքապետ, ընդդիմադիր գործիչ Էքրեմ Իմամօղլուին:

Մասնակիցների միայն 8.6 տոկոսն է նշել, որ նախագահի պաշտոնում տեսնում է քրդամետ ընդդիմադիր ուժ համարվող «Ժողովուրդների դեմոկրատական» կուսակցության նախկին համանախագահ Սելահաթթին Դեմիրթաշին, որը հիմա բանտում է:

Նշյալ սոցհարցման ժամանակ մասնակիցներին տրվել է նաև Ստամբուլի ջրանցքի կառուցման վերաբերյալ հարց: Նրանց 54.2 տոկոսը դեմ է արտահայտվել ջրանցքի կառուցմանը, իսկ 42.4 տոկոսը՝ կողմ:

Աղբյուրը՝ ermenihaber.am