Տեղի է ունեցել շատ գաղտնի, փակ հավաք, որոշում է կայացվել ուղիղ թիրախի տակ վերցնել ԱԱԾ-ն (տեսանյութ)
«ՎԵՏՕ» շարժման հիմնադիր Նարեկ Մալյանը շարունակում է պնդել, որ Արդարադատության նախարար Ռուստամ Բադասյանի կինն առնվազն 4 ամիս աշխատել է երկու աշխատավայրում, այդ երկու աշխատավայրերից ստացել է եկամուտ, վճարել է հարկեր, իսկ ԱԺ պաշտոնական կայքում էլ նախարարի կնոջ տվյալները տեղադրված են եղել և հեռացվել են միայն երեկ՝ իր գրառումից հետո։
Այս մասին այսօր 168.TV-ի «Ռեվյու» հաղորդաշարի եթերում ասաց Նարեկ Մալյանը՝ նշելով, որ շուտով փաստերով կապացուցեն, որ Արդարադատության նախարարի՝ այդ թեմայով արված հերքումն իրականությանը չի համապատասխանում։
Նախարարը գրել էր. «Կինս դեռևս 2019 թվականի ամռանից չի աշխատում ՀՀ ԱԺ փոխնախագահ Լենա Նազարյանի գրասենյակում»:
Նարեկ Մալյանը համամիտ չէ նախարարի հերքման տեքստի այն հատվածի հետ, որ «Պատվիրատուի պատվերը կրկին վատ է իրականացվում, իսկ այդ նպատակով տրամադրված գումարները զրո արդյունք են տալիս»։
«Իմ պատվիրատուն ՀՀ քաղաքացիներն են, մեր շարժումը ֆինանսավորվում է ՀՀ քաղաքացիների կողմից։ Կրկնում եմ՝ իմ և «ՎԵՏՕ»-ի պատվիրատուները ՀՀ գիտակից քաղաքացիներն են։ Ինչ վերաբերում է պատվերի արդյունավետությանը, ապա դա թող Ռուստամ Բադասյանին չանհանգստացնի։ Պատվերը, որն ինձ իջեցվել է ՀՀ քաղաքացիների կողմից, ես իրականացրել եմ պատվով, իսկ պայքարի հաջորդ փուլը լինելու է շատ կոշտ»,- ասաց Մալյանը:
Ինչ վերաբերում է ԱԺ փոխնախագահ Լենա Նազարյանի վերաբերյալ բացահայտումներին, ապա Մալյանը նկատեց, որ ապագայում կլինեն նորերը։
«Տիկին Նազարյանը հանդիսանում է նաև «Թրանսփերենսի ինտերնեյշնլ» հակակոռուպցիոն կենտրոնի կարկառուն ներկայացուցիչ և ակտիվորեն աշխատում է սորոսականների գծի մեջ եղողների հետ, ուստի նոր բացահայտումներ կլինեն»,- ասաց Մալյանը։
Անդրադառնալով վերջին օրերին մեդիայում շատ քննարկվող այլ՝ վարչապետ Նիկոլ Փաշինյանի որոշմամբ Վլադիմիր Կարապետյանի ազատ արձակման ու դրան Հայ ազգային կոնգրեսի արձագանքի բացակայության թեմաներին՝ Նարեկ Մալյանն ասաց, թե ՀԱԿ-ը հավանաբար լռում է, որովհետև ասելիքը գուցե կբարդացնի իրավիճակը։
«Կարող է նաև այդ լռությունը որոշակի կոռեկտության բաղադրիչ ունի իր մեջ, այսինքն՝ ՀԱԿ-ը չի ցանկանում բացահայտորեն հակադրվել գործող իշխանության հետ, որովհետև ՀԱԿ-ից միայն Վլադիմիր Կարապետյանը չէր, որ պաշտոն է զբաղեցրել այսօրվա իշխանության կազմում։ Այսօր այդ կուսակցությունից է Կենտրոնի թաղապետը, Սննդի անվտանգության պետական ծառայության պետը և այլ մարդիկ։ ՀԱԿ-ը որքան էլ խուսափի մտնել խաղի մեջ, միևնույն է՝ նա կրում է իշխանության իր մասը, հետևաբար՝ կրում է նաև պատասխանատվություն»,- ասաց Մալյանը։
Հարցին՝ եթե ՀԱԿ-ն այսօր իշխանության մաս է կազմում, այդ դեպքում ինչո՞ւ Նիկոլ Փաշինյանը շնորհավորական ուղերձ չհղեց Լևոն Տեր-Պետրոսյանին ծննդյան տարեդարձի կապակցությամբ, Նարեկ Մալյանը պատասխանեց.
«Կարող եմ ենթադրել, որ եթե նրանց հարաբերությունները լավ են, այդ քայլով փորձել են ցույց չտալ դրանք, իսկ եթե վատ են, արդեն մեկնաբանելու տեղ չկա։ Անձամբ ես իմ քաղաքական կյանքում այդքան մեծ դերակատարում ունեցած մարդուն կշնորհավորեի, եթե ես լինեի Նիկոլ Փաշինյանի փոխարեն»։
Խոսելով տոնական օրերին Դիանա Հարությունյան ֆեյսբուքյան կեղծ էջը վարողի բացահայտման վերաբերյալ ԱԱԾ-ի տարածած պաշտոնական տեսանյութի մասին՝ Մալյանն ուշադրություն հրավիրեց այն հանգամանքի վրա, որ Դանիել Իոաննիսյանն իր ֆեյսբուքյան էջում հրապարակել էր ապատեղեկատվությունը բացահայտող գործիքների մասին մեկ այլ տեսանյութ, որտեղ լսվում է այն նույն մարդու ձայնը, որը լսվում է ԱԱԾ-ի տարածած պաշտոնական տեսանյութի մեջ։
«Հետաքրքիր զուգադիպությամբ՝ ԱԱԾ-ի պաշտոնական այդ տեսանյութի ու Սորոսի փողերով Դանիել Իոաննիսյանի նկարած տեսանյութի մեջ խոսում է նույն մարդը, նույն ձայնն է լսվում, հետևաբար՝ կա՛մ ԱԱԾ-ն է Իոաննիսյանի համար ֆիլմեր նկարում, կա՛մ հակառակը՝ ԱԱԾ-ն սորոսականներից ստացել է պատրաստի տեսանյութ այդ ֆեյքի ձերբակալման մասին»,- ասաց Մալյանը։
Հարցին՝ իսկ ինչո՞վ է պայմանավորում այն, որ արդեն մի քանի ամիս է՝ վարչապետն ԱԱԾ տնօրեն ու ոստիկանապետ չի նշանակում, և այդ պաշտոնների համար նշանակված են ժամանակավոր պաշտոնակատարներ, Նարեկ Մալյանն ասաց. «Ձեր եթերից ցանկանում եմ անել մի հայտարարություն՝ նոյեմբերի 24-ին Աղվերանի «Արթուրս Ռիզորթ» հյուրանոցում եղել է սորոսականների շատ գաղտնի փակ հավաք, որտեղ որոշում է կայացվել ուղիղ թիրախի տակ վերցնել Ազգային անվտանգության ծառայությունը։ Իսկ ինչ վերաբերում է նրան, թե ինչո՞ւ ունենք ժամանակավոր պաշտոնակատարներ, ապա դրա պատճառն այն է, որ Նիկոլ Փաշինյանը գնալով համոզվում է, որ իրենից լավ որևէ մեկը չի աշխատում. միշտ վտանգ կա, որ մարդիկ, որոնց դու օժտում ես իշխանական լծակներով, ինչ-որ պահի կհասկանան, որ հիմար կատակի մեջ են ներքաշված, ու որոշում կկայացնեն դուրս գալ քո դեմ»։