New York Times-ը տեսանյութ է հրապարակել` Իրանի կողմից ուկրաինական ինքնաթիռի հնարավոր խոցման պահից

New York Times-ը տեսանյութ է հրապարակել, որում, ինչպես վստահեցնում է աղբյուրը, ֆիքսվել է Թեհրանի օդանավակայանի վերևում Ուկրաինայի միջազգային ավիաուղիներին պատկանող Boeing 737-800-ի խոցման պահն Իրանից արձակված հրթիռի կողմից:

19 վայրկյան տևողությամբ տեսանյութում երևում են շենքերը և գիշերային երկինքը, որն ինչ-որ պահի լուսավորվում է: Հրապարակմանն ուղեկցող տեքստում ասվում է, որ այս տեսանյութն «ստուգված է»:

Ավելի վաղ CBC-ն հայտարարել էր, որ Ուկրաինայի միջազգային ավիաուղիներին պատկանող Boeing 737-800-ը խոցվել է հրթիռի կողմից: Իրանը, սակայն, բացառել է դա: Ավելի ուշ Կանադայի վարչապետ Ջասթին Թրյուդոն հայտարարել էր, որ իր երկիրն ունի հետախուզական տվյալներ առ այն, որ Թեհրանում կործանված Boeing 737-800-ը սխալմամբ խոցվել է Իրանի կողմից:

Հիշեցնենք, որ հունվարի 8-ին Թեհրանում օդ բարձրանալուց րոպեներ անց ընկել է 167 ուղևորի տեղափոխող ինքնաթիռը, օդանավում գտնվող բոլոր մարդիկ զոհվել են: Ուղևորների թվում են եղել Իրանի, ուկրաինայի, Կանադայի, Գերմանիայի, Շվեդիայի և Աֆղանստանի քաղաքացիներ: