Իրանը կզբաղվի տարածաշրջանում ԱՄՆ ներկայությունն արմատախիլ անելով. «Կուդս»

Իրանի Իսլամական հեղափոխության պահապանների կորպուսի (ԻՀՊԿ) «Կուդս» հատուկ ստորաբաժանման նոր հրամանատար, բրիգադային գեներալ Էսմայիլ Հանին հայտարարել է, որ Իրանը վրեժ կլուծի տառապյալների արյան համար, հաղորդում է Mehr-ը:

Նա հանդես է եկել նման հայտարարությամբ Թեհրանում «Կուդս» հատուկ ստորաբաժանման ղեկավար, գեներալ Ղասեմ Սոլեյմանիի հուղարկավորության ժամանակ՝ նշելով, որ «թափված սրբազան արյան համար վրեժը կշարունակվի՝ հանուն դիմադրության»:

«Մենք խոստացել ենք հետեւել տառապյալ գեներալ Սոլեյմանիի ուղուն, եւ Աստծո օգնությամբ կձեռնարկենք հսկայական քայլեր՝ տարածաշրջանում ԱՄՆ ներկայությունն արմատախիլ անելու համար»,- ասել է նա:

Հունվարի 3-ի գիշերը ԱՄՆ-ը Բաղդադի օդանավակայանի շրջանում գործողություններ է անցկացրել, որոնց հետեւանքով սպանվել են Ղասեմ Սոլեյմանին եւ Իրաքում շիական աշխարհազորայինների հրամանատարի տեղակալ Աբու Մահդի ալ-Մուխանդիսը, որոնց Վաշինգտոնում համարում են 2019 թվականի դեկտեմբերի 31-ին Բաղդադում ԱՄՆ դեսպանատան վրա հարձակման կազմակերպիչներ:

Իրանի հոգեւոր առաջնորդ այաթոլլահ Ալի Խամենեին եռօրյա սուգ է հայտարարել եւ ասել է, որ դաժան վրեժ է սպասվում նրանց, ում ձեռքերի վրա է Սոլեյմանիի եւ մյուս տառապյալների արյունը:

ԱՄՆ նախագահ Դոնալդ Թրամփը խոստացել է Իրանում 52 թիրախների ուղղությամբ «արագ եւ ուժեղ հարված հասցնել», եթե հարձակման ենթարկվեն ամերիկացիները:

Կարդացե՜ք նաև

Իրանցի գեներալ Ղասեմ Սուլեյմանիի սպանության հետեւանքները Հայաստանի եւ տարածաշրջանի համար