Իրանը Պոմպեոյին «ամբարտավան ծաղրածու» է անվանել` Սուլեյմանիի մասին խոսքերի պատճառով (լուսանկարներ)

Իրանի ԱԳ նախարար Ջավադ Զարիֆը ԱՄՆ պետքարտուղար Մայք Պոմպեոյին «ամբարտավան ծաղրածու» է անվանել ի պատասխան վերջինիս այն հայտարարությանը, որ Իրաքի քաղաքացիները ուրախանում են Բաղդադում Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սուլեյմանիի սպանությամբ, գրում է Daily Mail-ը:

Պոմպեոն հունվարի 3-ին հայտարարել էր, որ իրաքցիները «փողոցներում պարում են իրենց ազատության համար»: Նրա խոսքով՝ իրաքցիները երախտապարտ են Սուլեյմանիի սպասնության համար:

«24 ժամ առաջ ամբարտավան ծաղրածուն, որը ներկայանում է որպես դիվանագետ, հայտարարել է, որ մարդիկ պարում են Իրաքի փողոցներում»,- Twitter-ում գրել է Զարիֆը:

Իր գրառման մեջ նա չի նշել Պոմպեոյի անունը, սակայն հավելել է, որ «այսօր Իրաքում մեր հազարավոր եղբայրները և քույրերը պատասխանել են այդ մարդուն»:

Իր գրառման վերջում Զարիֆը հայտարարել է նաև «Արևմտյան Ասիայում ԱՄՆ-ի թշնամական ներկայության ավարտի մասին»:

Իրանի ԱԳ նախարարի թվիթերյան գրառումը ուղեկցվել է հինգ լուսանկարներից բաղկացած ֆոտոկոլաժով:

Հիշեցնենք, որ հունվարի 3-ին Բաղդադում սպանվել է Իրանի իսլամական հեղափոխության պահապանների կորպուսի գեներալ Ղասեմ Սուլեյմանին: Գեներալի սպանությունից հետո Իրանի ԱԳՆ է կանչվել Շվեյցարիայի դեսպան Մարկուս Լեյթները, որը ներկայացնում է ԱՄՆ շահերը Թեհրանում:

Հաղորդվում է նաև, որ ԱՄՆ Զինված ուժերը բարձր մարտունակության են բերվել իրանցի գեներալի սպանությունից հետո:

Իրանի գերագույն հոգևոր առաջնորդ Այաթոլլահ Ալի Խամենեին խոստացել է վրեժ լուծել Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սուլեյմանիի սպանության համար:

Ավելի ուշ ԱՄՆ նախագահ Դոնալդ Թրամփը հայտարարել էր, որ հրամայել է սպանել Սուլեյմանիին, որպեսզի կանխի պատերազմը՝ հավելելով, որ գեներալը ամերիկացիների վրա «չարաբաստիկ» հարձակումներ է ծրագրել:

«Անցած գիշեր մենք միջոցներ ձեռնարկեցինք, որպեսզի դադարեցնենք պատերազմը։ Մենք ոչ մի գործողություն չենք ձեռնարկել պատերազմ սկսելու համար»,- հայտարարել էր ԱՄՆ նախագահը: