ԵՄ-ն մտահոգություն է հայտնել Լիբիայի հակամարտությանը միջամտելու Թուրքիայի որոշման առնչությամբ

Եվրամիությունը լրջորեն մտահոգված է Թուրքիայի իշխանությունների՝ Լիբիայում տիրող հակամարտությանը միջամտելու որոշմամբ և կարծում է, որ այդ քայլը կարող է հանգեցնել երկրում իրավիճակի հետագա ապակայունացման: РИА Новости-ի փոխանցմամբ՝ այս մասին ասվում է ԵՄ արտաքին քաղաքականության ծառայության հաղորդագրության մեջ:

«ԵՄ-ն խիստ մտահոգված է Թուրքիայի որոշմամբ՝ միջամտելու հակամարտությանը: Աջակցությունը նրանց, ովքեր այնտեղ պայքարում են, կհանգեցնի երկրում և տարածաշրջանում իրավիճակի հետագա ապակայունացմանը միայն: ՄԱԿ-ի զենքի էմբարգոն պետք է պահպանվի բոլորի կողմից»,- ասվում է Եվրահանձնաժողովի մամլո ծառայության ներկայացուցիչ Փիթեր Ստանոյի թվիթերյան հաղորդագրության մեջ:

Ստանոն հավելել է, որ Լիբիայի հակամարտությանը խաղաղ կարգավորումից բացի այլընտրանքային լուծում չի կարող լինել:

Հիշեցնենք, որ հինգշաբթի Թուրքիայի խորհրդարանը ձայների մեծամասնությամբ օրենք է ընդունել թուրքական զորքերը Լիբիա ուղարկելու մասին:

Բաժանորդագրվեք Top-News.am-ին Telegram-ում