«Պարո՛ն Նիկոլ Փաշինյան, ձեր հանձնարարականները ձախողողներին ինչո՞ւ չեք պատժում». Հրաչ Բերբերյան

«Ագրարագյուղացիական միավորում» հ/կ ղեկավար Հրաչ Բերբերյանի կարծիքով՝ 2019 թվականը ծանր է եղել գյուղացու համար:

Ամենալուրջ հարվածն էլ եղել է Գյուղատնտեսության նախարարության փակումը:

«Կառավարությունը խոստացել էր, բայց գյուղացին այդպես էլ բարենպաստ վարկերը չտեսավ: Մենք տարվա սկզբին ասել էինք, որ սուբսիդավորումը պետք է տալ ոչ թե բանկերին, այլ գյուղացուն: Մոտ 10-12.000 հեկտարով պակասել են կարտոֆիլի ցանքատարածությունները, 30 տոկոսով էլ՝ ցորենի: Կարտոֆիլ արտահանող երկրից հիմա դարձել ենք ներկրող երկիր: Հանրապետություն կարտոֆիլ ներկրվել է Բելառուսից, անգամ ժողովուրդը խոսում է, որ Պակիստանից է 150 տոննա բերվել»,- ասաց նա:

Նրա փոխանցմամբ՝ ավելացել է նաև խոշոր և մանր եղջերավոր անասունների մսի ներկրումը, մորմազգիների ցեցի դեմ պայքարը ձախողվել է:

«Պարո՛ն Նիկոլ Փաշինյան, ձեր հանձնարարականները ձախողողներին ինչո՞ւ չեք պատժում»,- հարց բարձրացրեց Հրաչ Բերբերյանը:

Նրա դիտարկմամբ՝ խաղողի արտադրության թվերն արհեստականորեն ուռճացված են:

«Որովհետև հաշվետվությունը ոչ թե արտադրողը, այլ գյուղապետարանն ու մարզպետարանն են տալիս, ամփոփվում է Էկոնոմիկայի նախարարությունում, ապա նոր ուղարկում են Վիճակագրական կոմիտե: Այսինքն, ոնց ուզենան՝ կկարեն, արտադրողը հաշվետու չէ»,- նշեց «Ագրարագյուղացիական միավորում» հ/կ ղեկավարը:

Ինչ վերաբերում է արտահանվող պտուղ-բանջարեղենին՝ քիչ քանակությամբ ծիրան է արտահանվել:

«Այստեղ չի կարելի մեղադրել իշխանությանը, քանի որ ունեցանք անձրևային երկարատև սեզոն, այգիների փոշոտումը որակով չկատարվեց: Մեղվի մեծ քանակի անկում նույնպես կա, բայց ամբողջ աշխարհում է այդպես: Եվրոպացի գիտնականների կարծիքով՝ դա կապված է բջջային կապի ճառագայթման հետ»,- նշեց Հրաչ Բերբերյանը: