Կապրենք, կտեսնենք՝ 1 տարի հետո դուք 35 եվրոյով Եվրոպա կթռնե՞ք։ Էս զանգի ձենը հետո կլսեք (տեսանյութ)
Քաղաքացիական ավիացիայի զարգացման համար Հայաստանի Կառավարության առաջին անելիքը պետք է լինի քաղավիացիայի մասին օրենսդրական դաշտի կարգավորումը, քանի որ մեզ մոտ այդ դաշտը բաց է։ Այս մասին 168.TV-ի «Ռեվյու» հաղորդաշարի եթերում ասաց «Հայկական ավիաուղիների» արհմիության վերջին նախագահ, օդաչու Արտաշես Եփրեմյանը:
«Քաղավիացիայի կոմիտեն իր դերը հիմա չի կատարում։ Որպես մասնագետի՝ ինձ մոտ տպավորություն է ստեղծվում, որ և՛ Տաթևիկ Ռևազյանը, և՛ Քաղավիացիայի կոմիտեն ծառայում են «Արմենիա» միջազգային օդանավակայանին և անում են այնպես, որ հանկարծ այս ընկերության շահերը մի կոպեկով չպակասեն։ Քաղավիացիայի կոմիտեն թողել է իր բուն գործը և զբաղված է այլ գործերով, ուստի առաջարկում եմ Կառավարությանը, Տրանսպորտի և կապի նախարարությանը՝ օրենսդրական դաշտի բացերը վերացնել և վերականգնել Քաղաքացիական ավիացիան, և ինչպես այդ դաշտը մոնոպոլ ձևով տվեցին պարոն Էդուարդ Էռնեկյանին, նույն ձևով էլ կնքված պայմանագիրը վերանայեն, ընդունեն օդային օրենսգիրք»,- ասաց Եփրեմյանը։
Անդրադառնալով «Պետական տուրքի մասին» օրենքում կատարված փոփոխություններին, ըստ որի՝ վերջին 12 ամսում չսպասարկված նոր ուղղություններից օգտվել պատրաստվող ուղևորներն օդի տուրքի գումար չեն վճարի, Արտաշես Եփրեմյանն ասաց, որ դա կստեղծի անհավասար մրցակցային պայմաններ։
«Դա շոու է։ Մյուս կողմից՝ այլ ավիաընկերություններ դատի են տալու։ Ի՞նչ է նշանակում՝ վերջին 12 ամսում չսպասարկված ուղղությունների համար հանում եք օդի տուրքը, սա աճպարարություն և աբսուրդ է, որն ավելի մեծ վտանգ է բերելու մեզ։ Եթե դուք շարժվում եք միջազգային օրենքներով, ուրեմն բարի եղեք ապահովել օրենքներ բոլորի համար։ Սրա ձայնը հետո կլսենք։ Տաթևիկ Ռևազյանը քանի որ խոստում էր տվել, Կառավարությունը սատար կանգնեց նրան և հիմա բերել են այս լոուքոսթերները, բայց կրկնում եմ՝ սրա ձայնը հետո կլսենք։ Իրենք դարձել են իրենց խոսքերի գերին, և այդ փոփոխությունն արվեց «Ռյան Էյր» ավիաընկերության համար և միայն։ Կապրենք, կտեսնենք՝ մի տարի հետո դուք 35 եվրոյով Եվրոպա կթռնե՞ք։ Էս զանգի ձենը հետո կլսեք»,- ասաց Եփրեմյանը։
Ըստ օդաչուի՝ «Վիզա Էյր» և «Ռյան Էյր» ավիաընկերությունները Հայաստանի կառավարությունից ստացել են իրենց նվազագույն շահույթի ապահովումը։ «Դա այս ավիաընկերություններին տրված է, պետությունն իրագործում է նրանց անհրաժեշտ բոլոր պայմանները։ Չէ՞ որ մենք չգիտենք, թե «Արմենիա» ավիաընկերությունը վառելիքի և օդի տուրքի ինչ գին կսահմանի հետո, այսինքն՝ այդ ավիաընկերություններն ունենալու են շահույթ պետության հաշվին»,- ասաց նա։
«Հայկական ավիաուղիների» արհմիության վերջին նախագահը նաև նշեց, որ որպեսզի Հայաստանից հեռացած օդաչուները վերադառնան Հայաստան, իրենք՝ մասնագետներով, մշակել են բիզնես-պլան՝ երկրորդ ավիաօպերատոր ունենալու համար.
«Առաջարկում ենք ստեղծել ազգային ավիափոխադրող, իսկ պետությունն այդ նպատակին հասնելու համար պետք է օրենքի մակարդակով կարգավորի հետևյալը. այն ավիաընկերությունը, որը գրանցված է ՀՀ պետռեգիստրում, սեփականատեր է, 51 տոկոսը ՀՀ ռեզիդենտ է, իսկ աշխատողների 85-90 տոկոսը կկազմեն ՀՀ քաղաքացիները, իսկ պետությունը կունենա այդ ավիաընկերությունում ինչ-որ քանակի բաժնեմաս, այդ ավիաընկերությունը կկոչվի ազգային ավիափոխադրող»։
Նա նաև նշեց, որ, թեև առկա է ազգային ավիափոխադրող ունենալու հստակ հայեցակարգ, սակայն պետությունը չի ցանկանում գնալ շահերի բախման և հակադրվել «Արմենիա» ավիաընկերությանը։
«Պետությանն ասում ենք՝ թույլ տվեք օգնենք և աջակցեք օրենսդրական դաշտի կարգավորմամբ և արդեն կնքված պայմանագրի վերանայմամբ, որ «Զվարթոնց» միջազգային օդանավակայան համալիր կառուցենք այն հին շենքում, որը ցանկանում են քանդել, որ «Արմենիա» ավիաընկերությունը շարունակի չունենալ մրցակից։ Մենք պատրաստ ենք գտնել ներդրողներ, որոնք կարող են գալ ներդրում անել, և այդ հին շենքի վերագործարկմամբ մենք կունենանք 14 ինքնաթիռ ընդունող երկրորդ օպերատոր, որն էլ կբերի մրցակցության, ինչն էլ իր հերթին՝ կբերի գների նվազման։ Եթե օդանավի մեկ թռիչքային ամբողջ փաթեթն արժե 4500 դոլար, մենք դա կանենք 3500 դոլարով։ Անցալ տարի Չինաստանից եկան ներդրողներ, որոնք պետությունից իրենց ներդրումներն անելու համար երաշխիք էին ցանկանում, ինչը, սակայն, չստացան, հիմա եթե մեզ այդ երաշխիքը տան, մենք կփորձենք գտնել ներդրողներ»,- ասաց Եփրեմյանը։
Վերջինս նաև նշեց, որ այս նպատակով նամակ են հղել վարչապետ Նիկոլ Փաշինյանին՝ բազմաթիվ օդաչուների ստորագրությամբ, սակայն մինչ այս պահը որևէ պատասխան չեն ստացել, թեև նամակին կից նաև ներկայացրել են ավիացիան զարգացնելու իրենց ռազմավարությունը։
«Մինչ այս պահն արձագանք չկա։ Մենք ներկայացրել ենք նաև բիզնես-պլան, սակայն մեզ չեն ցանկանում լսել, թեև առաջարկում ենք անգամ ինքնաթիռների տիպերով բիզնես-պլան։ Եթե պետությունը չի ցանկանա փող դնի, թող այդ ժամանակ մեզ աջակցի շենք-շինություններով։ Պարոն Էռնեկյանին տվել են ամբողջ Փարաքարի տարածքը, դա սխալ մոտեցում է, եկեք ստեղծենք շուկայական հարաբերություններ, որը կբերի գների նվազեցման, իսկ այդ օդի տուրքի հանելը գների նվազում չի ապահովելու»,- ասաց Եփրեմյանը։