Հայազգի լրագրող Էթյեն Մահչուփյանը նշանակվել է Դավութօղլուի հիմնած կուսակցության հետազոտությունների ու տեղեկատվության գծով ղեկավար

Հայտնի են դարձել վերջերս Թուրքիայի նախկին վարչապետ Ահմեդ Դավութօղլուի հիմնած «Ապագա» կուսակցության տարբեր ոլորտների գծով ղեկավարների և համակարգողների անունները: Այս մասին տեղեկացնում է Gazete Duvar պարբերականը:

Ankara Meyra Palace հյուրանոցում տեղի ունեցած հանդիպումից հետո Դավութօղլուն հայտարարել է կուսակցության ղեկավար կազմում ընդգրկված անձանց անունները: Նախագահական խորհրդում ընդգրկվել է 17 անձ, համակարգող խորհրդում, որը կոչվում է նաև «ստվերային կառույց»՝ 16 անձ:

Կուսակցության համահիմնադիր և գործադիր խորհրդի անդամ, պոլսահայ լրագրող Էթյեն Մահչուփյանը նշանակվել է կուսակցության հետազոտությունների, զարգացման ու տեղեկատվության գծով ղեկավար:

Ինչպես ավելի վաղ տեղեկացրել էր Tert.am-ը, Դավութօղլուի նորաստեղծ կուսակցության համահիմնադիրների ցանկում է նաև հայազգի լրագրող Էթյեն Մահչուփյանը, որը տևական ժամանակ զբաղեցրել է այն ժամանակ վարչապետ Ահմեդ Դավութօղլուի գլխավոր խորհրդականի պաշտոնը: