Արմեն Թավադյանը բազմիցս ասել է՝ ինքը Ռոբերտ Քոչարյանի ընկերն է, նրա ձերբակալությունը նաև ճնշում է «5-րդ ալիքի» վրա. Հարություն Հարությունյան

Արմեն Թավադյանը բազմիցս ասել է, որ ինքը Ռոբերտ Քոչարյանի ընկերն է, նրա ձերբակալությունը հասարակական հնչեղություն ապահովելու համար է, բնականաբար, նաև դա համարում եմ ճնշում «5-րդ ալիքի» վրա: Այս մասին Tert.am-ի հետ զրույցում ասաց «5-րդ ալիք» հեռուստաընկերության տնօրեն Հարություն Հարությունյանը՝ անդրադառնալով հեռուստաընկերության տնօրեն Արմեն Թավադյանի ձերբակալությանը:

«Եթե որևէ լրատվամիջոցի, որևէ հեռուստատեսության սեփականատիրոջը ձերբակալում են և շոշափվում է նաև տվյալ հեռուստամիջոցի անունը, պարզ է չէ՞, որ դա բարոյահոգեբանորեն ճնշում է նաև տվյալ լրատվամիջոցի վրա: Բացի այդ, մենք ամիսներ շարունակ այդ ճնշումը զգացել ենք, մեզ համար սա նորություն չէր, որ ինչ-որ մեկին պետք է ձերբակալեին: Հիմա Արմեն Թավադյանին են ձերբակալել, գործը այդ ձևով են պատրաստել, բայց այդ ճնշումները ամիսներ առաջ եղել են «5-րդ ալիքի» վրա, այնպես չէ, որ 5-րդը հանկարծակի հայտնվեց ճնշումների կենտրոնում, մենք մեկ տարի աշխատում ենք և մեկ տարի էդ ճնշումների տակ ենք»,- ասաց նա:

Հարություն Հարությունյանի խոսքով՝ ճնշումները տարբեր ձևերով են՝ ֆեյքերի բանակներով, հրահանգավորված «5-րդ ալիք» հյուր չգալով, ՀԸ-ի հասցեին հատուկ ինչ-որ հոդվածներ պատրաստելով: «Մեզ տարբեր հարթակներում «ֆեյք նյուզ» են համարում. այսինքն` այդ ճնշումները պարբերաբար եղել են, և ինչ-որ պահի պետք է զարգացումներ ունենային, և հիմա այդ զարգացումների փուլն է: Հիմա կարող է մեկ այլ՝ ավելի ծանր փուլում հայտնվենք»,- շեշտեց նա:

Իսկ թե ինչ փուլի մասին է խոսքը, նա ասաց, որ չի կարող ասել. «Սցենարը «5-րդ ալիքում» չի գրվում, սցենարը գրվում է վարչապետի աշխատակազմում կամ հենց վարչապետի սեղանին դրված թղթի վրա: Ես չեմ կարող ասել, թե ինչ կարող է լինել, չեմ կարող ասել, թե վարչապետը գիշերը քնի, առավոտն արթնանա ինչ նոր բան կորոշի, իրեն պետք է հարցնել՝ հաջորդն ի՞նչ է լինելու: Իսկ եթե չկա հաջորդի պատասխանը, կսպասենք, կտեսնենք»,-նշեց Հարությունյանը և հավելեց.

«Եթե հրաժարվում են մեկ տարի շարունակ գալ մեզ մոտ և ոչ թե հրաժարվում են իրենց ցանկությամբ, այլ պարզ ասում են՝ գիտեք, շատ ենք ուզում ձեր եթերում խոսել, բայց մեզ արգելված է: Ես չեմ չէ՞ արգելում, պարզ է չէ՞, որ զոքանչն ու կինն էլ չեն արգելում այդ պաշտոնյային»:

Հարություն Հարությունյանը նշեց, որ Թավադյանի ձերբակալությունը, սակայն, չի կապում միայն «5-րդ ալիքի» վրա ճնշում գործադրելու հետ: «Արմեն Թավադյանը բազմիցս ասել է, որ ինքը Ռոբերտ Քոչարյանի ընկերն է, և ես հպարտ եմ, որ կա այդպիսի ընկերություն: Նա Ռոբերտ Քոչարյանի ընկերն էր և ակտիվ մասնակցում էր երկրորդ նախագահի ազատության, արդարության պայքարին՝ ի տարբերություն շատերի: Հիմա թեման տաք պահելու համար, իրենք ստեղծեցին մի հատ սցենար, և այդ նախապես գրված սցենարը փնթի ձևով է գրված»,- նշեց նա:

Նրա խոսքով՝ ոստիկանությունը տարածեց տեսահոլովակը, բոլոր լրատվամիջոցները դա հրապարակեցին՝ առանց որևէ մեկնաբանության. «Ոչ մեկի մտքով չանցավ, որ այս եղանակին կարճաթև հագած մարդ չի լինում, կամ որ տվյալ իրավիճակում ոչ մեկն օֆիսում չի կարող ավտոմատ դնել և ցույց տալ, ոչ մեկի մտքով չանցավ, որ օպերատիվ նկարահանումները երեք տեսախցիկով չեն անում, ոչ մեկի մտքով չանցավ, որ Ռոբերտ Քոչարյանի գործը, որն ընթանում է, ոչ մի կապ չունի տուժողների, տուժածների ցուցմունքի հետ: Ըստ ՀՔԾ-ի՝ եթե 800 հոգի կան, որոնք ցուցմուքն են տվել, մեկ հոգու ինչո՞ւ պետք է կանչեին ու ասեին՝ արի դու հրաժարվի այդ ցումցունքից, բա այն 799-ը՞: Էնքան պարզունակ է այս ամեն ինչը»,- նկատեց Հարությունյանը:

Բացի այդ, ըստ նրա, այդ ամենն արվեց հասարակական հնչեղություն ապահովելու համար: «Մենք տարի ու կես է ապրում ենք «Երկիր-Հայկական ժամանակ»-ում. մի իրավիճակում, ինչպես այն ժամանակ ՀԺ-ում էին հորինում, գրում, հիմա էլ են հորինում: Իշխանությունն իրենց ձեռքին է, հորինում են ու տալիս են «իրավապահներին», չակերտավոր, որովհետև այդ համակարգն այլևս ոչնչացված է, գոյություն չունի»,- ասաց նա:

Հարություն Հարությունյանն օրինակ բերեց, որ եթե օրը ցերեկով կարող են գնալ 4-րդ հարկից համալսարանի ուսանողին ձեռնաշղթաներով ցուցադրաբար իջեցնել, տանել, հետո կես ժամ անց բաց թողնի, որովհետև իրենք սխալ են եղել, արդեն անլուրջ է այս ամեն ինչի մասին խոսելը: «Մենք պետք է հասկանանք, թե ինչպիսի երկրում ենք ապրում, մեկնաբանություններն արդեն ավելորդ են դառնում, ինչը մեկնաբանե՞ս, իրավական ո՞ր ոլորտի գործունեությունը մեկնաբանես՝ ոստիկանությա՞ն, ՀՔԾ-ի՞, դատախազության գործունեությունը մեկնաբանե՞ս, դրանք ընդամենն այլևս միայն անուններ են, ուրիշ ոչինչ»,- շեշտեց նա: