Ահմեդ Դավութօղլուն մարտահրավեր է նետում Էրդողանին

Թուրքիայի նախկին վարչապետ Ահմեդ Դավութօղլուն ստեղծել է նոր քաղաքական կուսակցություն, որը կարող է մարտահրավեր նետել իշխող «Արդարություն եւ զարգացում» կուսակցությանը, հայտնում է Reuters-ը։

Դավութօղլուն «ապագա կուսակցության «գրանցման հայտ է ներկայացրել ՆԳՆ, գրում է Cumhuriyet-ը։ Նա ծրագրում է կուսակցության ստեղծման մասին հայտարարել ուրբաթ օրը կայանալիք մամուլի ասուլիսում։

Նախկին փոխվարչապետ Ալի Բաբաջանը նույնպես հայտարարել է նոր կուսակցության ստեղծման մասին։ Երկու քաղաքական գործիչներն էլ լքել են ԱԶԿ-ն այս տարի։

Էրդողանի մրցակիցներ դարձած նախկին դաշնակիցների ղեկավարությամբ նոր կուսակցությունների առաջացումը տեղի է ունենում տնտեսական անկման եւ գործազրկության բարձր մակարդակի ֆոնին, ինչի դեմ պայքարում է այժմյան կառավարությունը։

ԱԶԿ-ն այս տարի քաղաքապետի ընտրություններում կորցրել էր կարեւոր քաղաքների՝ Ստամբուլի եւ Անկարայի վերահսկողությունը։

Երկու նոր կուսակցությունները կարող են իրենց կողմը գրավել դժգոհ ընտրողներին։ Դավութօղլուի կուսակցության մասին հարցումները ցույց են տվել, որ նա բնակչության 3,4 տոկոս աջակցություն ունի, իսկ Բաբաջանը՝ 8 տոկոս։

Անցյալ շաբաթ Էրդողանը Դավութօղլուին, Բաբաջանին եւ մյուս նախկին դաշնակիցներին մեղադրել էր խարդախության մեջ։

Դավութօղլուն պատասխան հարված էր հասցրել՝ խորհրդարանին կոչ անելով հետաքննություն սկսել Էրդողանի, նրա ընտանիքի անդամների, ինչպես նաեւ ներկա եւ նախկին բարձրաստիճան պաշտոնյաների հարստության վերաբերյալ։