Էրդողանը դատապարտված է «ճարահատյալ» քաղաքականություն վարելուն. Դավութօղլուի նախկին խորհրդական

Պոլսահայ լրագրող, Հայոց ցեղասպանության մասին հայտարարություններից հետո Թուրքիայի այն ժամանակվա վարչապետ Ահմեթ Դավութօղլուի խորհրդականի պաշտոնից ազատված Էթյեն Մահչուփյանը խոսել է ապրիլի 16-ի սահմանադրական փոփոխությունների վերաբերյալ հանրաքվեից հետո նախագահ Ռեջեփ Թայիփ Էրդողանի վարած քաղաքականության մասին:

Sputnik-ի թուրքական ծառայությանը տված հարցազրույցում Մահչուփյանն ասել է, որ համոզված է, որ Էրդողանը դատապարտված է «ճարահատյալ» քաղաքականություն վարելուն:

Ըստ նրա՝ Էրդողանը շատ ավելի վստահ քայլեր կձեռնարկեր, եթե կարողանար կառավարման նախագահական համակարգի օգտին հանրաքվեի ժամանակ հավաքել գոնե 60 տոկոս ձայն, սակայն առկա 51.4 տոկոսով նա հայտնվել է շատ ավելի բարդ իրավիճակում:

«Այժմ արդեն իշխող կուսակցության նախագահի պաշտոնում էլ վերընտրվել պատրաստվող Էրդողանի վրա ավելի մեծ պատասխանատվություն է ընկած: Ամեն սխալի դեպքում նրան են մատնացույց անելու: Նա շատ կցանկանար խուսափել այդ ամենից, սակայն ո՛չ նրա շրջապատը, ո՛չ էլ այդ կուսակցության ներքին մշակույթը դա թույլ չեն տա», - նշել է Մահչուփյանը:

Ավելի վաղ հայ մտավորականն անդրադարձել էր Նիդեռլանդների և Թուրքիայի միջև հարաբերությունների սրմանը և ասել, որ Թուրքիան դեմ կառնի պատին իր տնտեսական ու քաղաքական ամբողջ համակարգով, և դա կարող է ավելի շուտ տեղի ունենալ, քան շատերը կարծում են: