Թուրքիայում պուտչիստների հետ կապերի մեջ կասկածվող 189 մարդու կալանավորելու օրդեր է տրվել

Թուրքիայի դատախազությունը 189 մարդու կալանավորելու օրդեր է տվել «գյուլենականների ահաբեկչական կազմակերպության» (FETO) անդամների դեմ գործողության շրջանակում, որին Անկարան մեղադրում է 2016 թվականի հուլիսին հեղաշրջման փորձի կազմակերպման մեջ։ Ինչպես տեղեկացրել է Huberturk հեռուստաալիքը, կասկածվողների մեջ ավելի քան հարյուր զինվորական կա։

Ոստիկանությունը շուրջկալներ է սկսել հանրապետության 35 նահանգներում։ Զինվորականներից բացի ձերբակալության ենթակա են նաեւ այն անձինք, որոնք կասկածվում են ByLock բջջային հավելվածն օգտագործելու մեջ՝ գաղտնի գրագրության պատճառով։ Այդ ծրագրից, հայտարարում են Անկարայում, օգտվել են FETO-ի կողմնակիցները՝ գործողությունների նախապատրաստման եւ համակարգման համար։ Դրանք այն մարդիկ են, որոնք զբաղվել են հավաքագրված զինվորականների եւ ոչ բանակային խմբավորման օղակների միջեւ գործունեության համակարգմամբ, տեղեկացնում է ՏԱՍՍ-ը։

2016 թվականի հուլիսի 15-ին Թուրքիայի ԶՈւ զինվորների եւ սպաների մի խումբ պետական հեղաշրջման փորձ արեց։ Հիմնական դիմակայությունը ծավալվեց Ստամբուլում եւ Անկարայում, զոհվեց 250 մարդ՝ չհաշված պուտչականներին, ավելի քան 2 հազար մարդ վիրավորվեց։ Հեղաշրջման պատրաստման մեջ Անկարան մեղադրում է իսլամական քարոզիչ Ֆեթհուլա Գյուլենին եւ նրա հետ կապված FETO-ին։