Brexit-ից հետո ԵՄ-ն կընդլայնվի դեպի Բալկաններ. Ֆեդերիկա Մոգերինի

Եվրամիության կազմից Մեծ Բրիտանիայի դուրս գալուց հետո եվրոպական կառույցը կընդլայնվի Բալկանյան երկրների հաշվին: Корреспондент-ի փոխանցմամբ` այս մասին ԵՄ արտաքին քաղաքականության հարցերով գերագույն հանձնակատար Ֆեդերիկա Մոգերնին հայտնել է իտալական La Stampa-ին տված հարցազրույցում:

«Վստահ եմ, որ ԵՄ-ն կհամալրվի ապագա նոր անդամներով, այն չի սահմանափակվի միայն 27 երկրով: Կարծում եմ դա տեղի կունենա բալկանյան երկրների հաշվին, որոնց հետ անդամակցության հարցով բանակցություններ ենք վարում», - ասել է Մոգերինին:

ԵՄ-ին անդամակցելու Սերբիայի, Չեռնոգորիայի և Կոսովոյի հեռանկարների մասին խոսելիս Մոգերինին նշել է, որ դա կախված է այդ երկրներից յուրաքանչյուրի և ԵՄ-ի միջև հարաբերություններից, որոնց զգալի հաջողությունների են հասել 20 տարվա ընթացքում:

Բալկանյան երկրներից ԵՄ անդամ դառնալու պաշտոնական թեկնածուներից են Ալբանիան, Մակեդոնիան, Սերբիան և Չեռնոգորիան: Բոսնիան անդամակցության հայտ է ներկայացրել 2016-ի սկզբին: