Բրյուսելը դժգոհ է Մալթայի վարչապետից ու Ալիեւի դստեր հետ նրա օֆշորային կապերից

Եվրախորհրդարանականները բացահայտ դեմ են հանդես գալիս Մալթայի վարչապետ Ջոզեֆ Մուսկատին, այն հաղորդագրություններից հետո, որոնց համաձայն նա առնչություն ունի կոռուպցիոն սկանդալին, այդ թվում Ադրբեջանի դստեր մասնակցությամբ։

Բրյուսելում աճում է դժգոհությունը Մալթայի վարչապետի նկատմամբ, մինչդեռ Մալթան հիմա ԵՄ-ում նախագահող երկիր է, գրում է բրիտանական The Guardian–ը։ ԵՄ-ում նախագահության ժամանակ Մալթան չի արել ոչինչ, որպեսզի մաքրի սև փողեր լվացողի իր վարկանիշը, ինչը մտահոգում է Բրյուսելին։

Եվրախորհրդարանի հանձփնաժողովը նույնիսկ Մալթայի վարչապետին հրավիրել է Ստրասբուրգ՝ մայիսի 18-ին ցուցմունքներ տալու։ Սակայն Մուսկատը հայտնել է, որ դա հարմար ժամանակ չէ։

Մալթայի վարչապետը մնում է Պանամական փաստաթղթերի հետ սկանդալի կենտրոնում։ Ավելին՝ պարզվել է, որ Մալթայի բանկերից մեկում կան վարչապետի կնոջ, նրա երկու մտերիմ կուսակիցների ու Ադրբեջանի նախագահի դստեր՝ Լեյլա Ալիեւայի հաշվեհամարները։ Նույնիսկ ձայնագրություն է հայտնվել, որտեղ երեւում է, թե ինչպես է այդ բանկի սեփականատերը գիշերով հեռանում գրասենյակից՝ փաստաթղթերով լի պայուսակներով։ Նշենք, որ բլոգեր ու սյունակագիր Դաֆնա Կարունա Գալիցիան հայտնել էր, որ Egrant ընկերությունը, որը հիշատակված է Պանամական փաստաթղթերում, պատկանում է վարչապետի կնոջը։ Բացի դրանից բլոգերը պատմել է, որ ընկերությունը, որը գրանցված է Լեյլա Ալիեւայի անունով, ավելի քան մեկ միլիոն դոլար է փոխանցել Egrant ընկերությանը 2016-ին Դուբայում գրանցված բանկային հաշվեհամարի միջոցով։

Ադրբեջանի ու Մալթայի վարչապետի միջեւ կապը դժգոհություն է առաջացրել՝ հաշվի առնելով , որ երկրները համագործակցում են էներգետիկայի ոլորտում, ու Ադրբեջանի պետական նավթային ընկերությունը Մալթայի նոր էլեկտրակայանի բաժնետերն է։

Մուսկատն ու նրա կինը հերքում են իրենց առնչությունը այդ հաշվեհամարներին կամ էլ Egrant ընկերությանը։

Բացի դրանից Մալթայի ընդդիմության առաջնորդը պատմել է, որ ապացույցներ ունի, որ կառավորության աշխատակազմի ղեկավարը կաշառք է ընդունել՝ հարուստ ռուսաստանցիներին անձնագրեր վաճառելու դիմաց։

NEWS.am