Բյուլբյուլօղլիի խայտառակությունն իր հայտնի «մեթոդներով» փորձում է շտկել Մեհրիբան Ալիևան

Ադրբեջանի առաջին փոխնախագահ Մեհրիբան Ալիևան Բաքվում անցկացվելիք Միջմշակութային երկխոսության միջազգային IV փառատոնի շրջանակներում հանդիպել է «ՅՈւՆԵՍԿՕ»-ի գլխավոր քարտուղար Իրինա Բոկովայի հետ: Հաղորդում է «Azertag.az»-ը:
Հանդիպմանը Մեհրիբան Ալիևան գոհունակություն է հայտնել Իրինա Բոկովայի մասնակցությամբ ֆորումին, ինչպես նաև շեշտադրել այդ միջազգային միջոցառմանը քննարկվող հարցերի արդիականությունը:
Զրույցի ընթացքում ընդգծվել է «ՅՈւՆԵՍԿՕ»-ի և Ադրբեջանի միջև սերտ համագործակցության դուրս գալու մակարդակը, համատեղ ծրագրերի հաջող անցկացումը, ինչպես նաև քննարկվել են հետագա համագործակցությանը և հարաբերությունների զարգացմանը վերաբերող հարցեր:
Հիշեցնենք՝ ՅՈՒՆԵՍԿՕ-ի գլխավոր տնօրենի պաշտոնին հավակնող Ադրբեջանը ներկայացնող Փոլադ Բյուլբյուլօղլին ապրիլի 27-ին Ֆրանսիայում կայացած թեկնածուների լսումների նիստի ժամանակ խայտառակ իրավիճակում է հայտնվել:
Նիստի նախագահը զգուշացրել է Բյուլբյուլօղլիին, որ թեկնածուները պարտադիր կերպով պետք է խոսեն անգլերեն կամ ֆրանսերեն: Դեսպանը գրավոր պատրաստած մի քանի նախադասություն կարդալուց հետո, սակայն, ներողություն է խնդրել և անցել է ռուսերենին: «Ինքս գոհ չեմ իմ անգլերենի մակարդակից, սակայն կարևորը դա չէ, կարևորը այն է, թե ինչ կա մարդու գլխում»,- նշել է նա:
Բյուլբյուլօղլին չի կարողացել նաև հավուր պատշաճի պատասխանել նիստի ներկաների հարցերին` շարունակ շեշտադրելով միայն այն փաստը, իբր պատրաստվում է մեծ գումարներ բերել ՅՈՒՆԵՍԿՕ-ին տարբեր ծրագրերի իրականացման համար:

Zham.am