Աշխարհում կալանավորված 348 լրագրողներից 159-ը Թուրքիայում են

Աշխարհում կալանավորված 348 լրագրողներից 159-ը գտնվում են Թուրքիայում, այս մասին գրում է թուրքական demokrathaber.org կայքը` հղում անելով «Լրագրողներ առանց սահմանների» միջազգային կազմակերպության ամենամյա զեկույցին:

«Թուրքիան այլևս լրագրողների ամենամեծ բանտն է աշխարհում»- գրում է կայքի լրագրողներից Ջաներ Աքթանը` հավելելով, որ վիճակը կտրուկ վատացել է հատկապես Թուրքիայի նախագահ Ռեջեփ Թայիփ Էրդողանի հիմնած «Արդարություն և զարգացում» կուսակցության իշխանության գալու տարիներին:

Ամիսներ առաջ Եվրախորհրդի խորհրդարանական վեհաժողովը մամուլի ազատության վերաբերյալ պահանջներ է ներկայացրել Թուրքիային:

Եվրախորհրդի պատգամավորների դատին հանձնված զեկույցը, որն ընդունվել է 110 կողմ, 15 դեմ ձայների հարաբերակցությամբ, պահանջում է Թուրքիայից ազատ արձակել ահաբեկչական միջոցառումներին մասնակցելու մեղադրանքով ձերբակալված լրագրողներին, վերանայել Թուրքիայի քրեական օրենսգրքի «Թրքությունը վիրավորելու» մասին 301-րդ հոդվածը, ինչպես նաև «նախագահին վիրավորելու» մասին 229-րդ և «ժողովրդի մեջ ատելություն սերմանելու» մասին 216-րդ հոդվածները: Զեկույցը նաև կոչ է անում վերանայել համացանցի հրապարակումների վերաբերյալ մեղադրանքները։