Մայիսի 25-ին ՆԱՏՕ-ի գագաթնաժողովը կանցնի արդեն Չեռնոգորիայի մասնակցությամբ

Մայիսի 25-ին ծրագրված ՆԱՏՕ-ի գագաթնաժողովը կանցնի արդեն Չեռնոգորիայի մասնակցությամբ։ Այս մասին հայտնել է ՆԱՏՕ-ի գլխավոր քարտուղար Ենս Սթոլթենբերգը՝ ելույթ ունենալով Բրյուսելում Եվրախորհրդարանում, հայտնում է ՏԱՍՍ-ը։

«Իրականում կլինեն ոչ թե 28, այլ արդեն 29 անդամներ, քանի որ Չեռնոգորիան հիմա ՆԱՏՕ-ին անդամակցելու գործընթացի մեջ է»,- ասել է նա։

ՆԱՏՕ-ին անդամակցելու համար գործողությունների ծրագիրը Չեռնոգորիան ստացել էր 2009-ի դեկտեմբերին։ 2016-ի մայիսին ստորագրվել է արձանագրություն ՆԱՏՕ-ին Չեռնոգորիայի անդամակցության մասին, որից հետո հանրապետությունը ձեռք էր բերել դաշինքում դիտորդի կարգավիճակ։ Այդ արձանագրության վավերացումից հետո այդ երկիրը կդառնա ՆԱՏՕ-ի 29-րդ անդամը։ Հիմա արձանագրությունը վավերացրել են ՆԱՏՕ-ի 28 անդամներից 24-ը։

news.am