Հրանտ Դինքի հետ հանդիպումը եղել է հետախուզության պահանջով. Ստամբուլի նախկին փոխնահանգապետ

Ստամբուլում Դինքի սպանության գործով հերթական դատավարության ժամանակ ցուցմունք է տվել Ստամբուլի նախկին փոխնահանգապետ Էրգյուն Գյունգյորը։

Ստամբուլի հայկական «Ակոս»–ի փոխանցմամբ՝ Ստամբուլի նախկին փոխնահանգապետ Էրգյուն Գյունգյորը դատարանում պատմել է, որ 2004 թվականին Հրանտ Դինքին հրավրել է նահանգապետարան Ազգային հետախուզության ծառայության (MIT) պահանջով։

«Քանի որ ես ազգային փոքրամասնությունների գծով փոխնահանգապետն եմ, ես եմ հրավիել Հրանտ Դինքին իմ աշխատասենյակ։ Հանդիպմանը ներկա են եղել MIT–ի աշխատակիցները, որոնց որպես իմ ազգական եմ ներկայացրել Դինքին։

Մենք Դինքին ասեցինք, որ իր հրապարակումը, ըստ որի Աթաթուրքի հոգեզավակ, Թուրքիայի առաջին ռազմական կին օդաչու Սաբիհա Գյոքչենը Ցեղասպանությունից փրկված հայուհի է, խիստ բացասական արձագանք է գտել Թուրքիայում, եւ հայկական կառույցները թիրախում կարող են հայտնվել։ Հանդիպումը շատ ջերմ է անցել։ Որեւէ սպառնալիք չի եղել։ Դրանից հետո ես հանդիպման մասին պատմել եմ նահանգապետին»,–ասել է Էրգյուն Գյունգյուրը։

Նա նաեւ պնդել է, թե ինքը տեղյակ չի եղել, որ Հրանտ Դինքին սպառնացել են, եւ ի պաշտոնե ինքը իրավասություն չի ունեցել անվտանգության հետ կապված որեւէ քայլ անել։

Նշենք, որ ավելի վաղ թուրքական մամուլում տեղեկություններ էին հայտնվել, որ Էրգյուն Գյունգյորի հետ հանդիպմանը MIT–ի աշխատակիցները սպառնացել են Հրանտ Դինքին։