Գործ ունենք քաղաքական պատվերի հետ, Ռոբերտ Քոչարյանի գործի իրավական մասը ձևական բնույթ է կրում. Անդրանիկ Թևանյան (տեսանյութ)

Ռոբերտ Քոչարյանի գործը քաղաքական ու պետական կարևոր հարց է, և բոլորն էլ հասկանում են, որ գործի իրավական մասը ձևական բնույթ է կրում. մենք գործ ունենք քաղաքական պատվերի և քաղաքական ուղղորդման հետ: ՍԴ-ի դիմաց լրագրողների հետ զրույցում ասաց տնտեսագետ Անդրանիկ Թևանյանը:

«Հայաստանի նորանկախ պատմության մեջ սա բացառիկ է, երբ գործը կապված է նախագահի հետ և բացառիկ դեպք է նաև այն, որ գործադիր իշխանությունը ցանկանում է ամեն կերպ ճնշում գործադրել ՍԴ-ի վրա: Այնպես որ, այստեղ քաղաքական զուգահեռ գործընթացներ կան, որոնք նաև իրավական փաթեթավորում են ստացել»,-ասաց Թևանյանը:

Հիշեցնենք, որ Սահմանադրական դատարանն այսօր քննելու է «Ռոբերտ Քոչարյանի դիմումի հիման վրա՝ Հայաստանի Հանրապետության քրեական դատավարության օրենսգրքի 135-րդ հոդվածի 2-րդ մասի և 35-րդ հոդվածի՝ Սահմանադրությանը համապատասխանության հարցը որոշելու վերաբերյալ» հարցը: Միաժամանակ, նախքան դիմումի քննությունը բողոքի տարբեր ակցիաներ են ընթանում Սահմանադրական դատարանի դիմաց:

Թևանյանի խոսքով՝ ակնհայտ է, որ այս հարցով ճնշումներ կան Սահմանադրական դատարանի վրա. դրանք սկսվեցին դատարանները շրջափակելու մասին կոչով և շարունակվեցին ՍԴ դատարանի վրա հարձակումներ գործելով:

«Այդ գործողությունները, համարժեք պատասխան ստանալով, չհասան իրենց նպատակին, և հիմա փորձ է արվում նոր միջոցներով ՍԴ-ն գրավել, բայց, ես կարծում եմ, մեր հասարակությունը և քաղաքական դաշտի առողջ հատվածը պետք է ամեն կերպ խոչընդոտեն այդ հարձակումները ու թույլ չտան, որ գործադիր իշխանությունը սեփականաշնորհի դատական իշխանությունն այնպես, ինչպես սեփականաշնորհել է օրենսդիրը»,-նկատեց Թևանյանը:

Դիտարկմանը, թե Ռոբերտ Քոչարյանի աջակիցների՝ ՍԴ-ի դիմաց իրականացվող ակցիան ևս կարող է ՍԴ-ի վրա ճնշում դիտարկվել, Թևանյանը չհամաձայնեց, նա նշեց՝ նույն տրամաբանությամբ՝ պետք է որպես ճնշում դիտարկել նաև 6-րդ գումարման ԱԺ-ի և գործադիր իշխանության լուծարման գործընթացը: «Սա քաղաքացիների իրավունքն է»,-ասաց նա:

Թևանյանը նշեց՝ ակնկալում են, որ Հայաստանում առաջիկայում կփոխվի քաղաքական մթնոլորտը, քաղաքական շոուներն ու հետապնդումները կվերանան և վերջապես, հնարավոր կլինի զբաղվել հրատապ խնդիրներով՝ տնտեսական, անվտանգության հարցեր, Արցախի խնդրի կարգավորում և այլն:

«Գործադիր իշխանությունը քանի որ չի կարողանում կոնկրետ արդյունքներ ապահովել, զբաղվում է քաղաքական շոուներ անելով: Շուտով ձմեռ է գալու ու մեր քաղաքացիներին առաջնահերթ հետաքրքրում է՝ որքան է լինելու գազի գինը. որևէ ձայն-ծպտուն չկա ու նույնիսկ խոսակցություն կա, որ կարող է թանկանալ: Լարսի գինը, հայ-ռուսական հարաբերությունները ինչպես են լինելու. դրանք խնդիրներ են, որոնցից խուսափում է գործադիրը և զբաղված է ֆեյսբուքյան գրառումներով ու էժանագին տեսանյութեր տարածելով»,-ասաց Անդրանիկ Թևանյանը:

Լրագրողների հետ զրույցում Անդրանիկ Թևանյանը նաև նշեց, որ հետհեղափոխական սկզբնական շրջանում շատերի մոտ այն տպավորությունն էր, որ նոր իշխանությունները «Ռոբին Հուդ»-ի վարքագիծ են դրսևորելու, այսինքն՝ հարուստներից փողը վերցնելու են ու բաժանելու են աղքատներին. «Նման պատրանքներ բոլոր ժամանակներում էլ լինելու են: Իշխանությունները տեսան, որ մեր ժողովուրդն այդ պատրանքներով չի կարող կերակրվել: Փաստն այն է, որ կուլակաթափությամբ որևէ երկիր զարգացում չի ապրել, իսկ հակառակ գործընթացը մենք տեսել ենք: Ես կարծում եմ՝ այս շոուները երկար չեն կարող լինել ու գործադիրը պետք է պատասխան տա»:

Ինչ վերաբերում է հեղափոխությունից 1,5 տարի անց նախկին ՊԵԿ նախագահ Գագիկ Խաչատրյանի կալանավորմանը, ապա Անդրանիկ Թևանյանն այն պայմանավորում է իշխանությունների վարկանիշի անկումով: Ասում է՝ իշխանությունն ունի պահուստային քարեր, որոնք պարբերաբար նետում է: