Արագիլներին վնասած տնտեսվարողները կենթարկվեն քրեական պատասխանատվության (տեսանյութ)
Գրեթե 1 ամիս Արարատի մարզում բազմաթիվ արագիլներ ոչ թե սովորականի պես` բնի մեջ են, այլ՝ գետնի վրա, իսկ նրանց ուտելիքով ապահովում են տարածքի բնակիչները: Հովտաշեն համայնքի ղեկավարի տեղակալ Արմեն Ալեքսանյանն ասում է ՝ ամեն օր ձուկ են տալիս, խնամում են թռչուններին, որպեսզի չսատկեն:
«Ամեն մեկին օրական մոտավորապես 300 գրամ ձուկ ենք տալիս, գյուղի բնակիչները նույնպես կերակրում են արագիլներին, բոլորն էլ սրտացավ են»,- ասաց Ալեքսանյանը:
Բնապահպաններն արդեն 2 անգամ այցելել են արագիլներին, մաքրող հատուկ միջոցներով լողացրել են առայժմ 5 թռչուն: Ըստ նախնական վարկածի՝ արագիլների թռչել չկարողանալու պատճառն իրենց մոտակա ձկնաբուծարաններում աճեցվող թառափներն են. ձկան մասսայական սպանդի ժամանակ թափոնները, որոնք շատ մեծ յուղային մաս են պարունակում, լցնում են հարակից գետը, ինչը նաև կեր է հանդիսանում արագիլների համար:
«Հիմնական խնդիրն այն է, որ թռչուններն ինչ-որ յուղային շերտով պատված ջրային միջավայրում են հայտնվում, ինչի արդյունքում իրենց փետուրների վրա է նստում յուղը, փետուրը կորցնում է իր ջերմամեկուսացման և թռիչքի ֆունկցիան»,- ասաց արագիլների խնամքով զբաղվող նախաձեռնության համակարգող Կարեն Աղաբաբյանը:
Հարակից ձկնաբուծարանից ասացին, որ իրենք ձկան մնացորդները կա՛մ թափում են 4 մետրանոց փոսերում, կա՛մ վարձում են մեքենաներ, որոնք հեռացնում են թափոնները: Իսկ Հովտաշենում գործող «Էկո ֆուդ» ձկան պահածոյացման արտադրամասի փոխտնօրեն Ռոման Սարգսյանի խոսքով՝ իրենք այժմ արձակուրդում են, արտադրամասը չի աշխատում և հետևաբար, թափոններ չունեն:
Բնապահպանության և ընդերքի տեսչական մարմնի կենդանական աշխարհի վերահսկողության բաժնի պետ Արթուր Բեգլարյանի խոսքով՝ արդեն փորձանմուշներ են վերցրել և՛ ջրից, և՛ արագիլներից՝ աղտոտվածության պատճառը պարզելու:
Հայաստանի Հանրապետության քրեական օրենսգրքի 240-րդ հոդվածը սահմանում է՝ գետերի, լճերի և մյուս ջրամբարների ու ջրի աղբյուրների աղտոտումը կամ աղբոտումը չմաքրված կամ չվնասազերծված կեղտաջրերով, արդյունաբերական, գյուղատնտեսական, կոմունալ և այլ ձեռնարկությունների, հիմնարկների ու կազմակերպությունների թափոններով ու մնացուկներով, որոնք վնաս են պատճառել կամ կարող են պատճառել մարդկանց առողջությանը կամ էլ գյուղատնտեսական արտադրությանը կամ ձկան պաշարներին` պատժվում են ազատազրկմամբ մինչև երկու տարի ժամանակով, կամ ուղղիչ աշխատանքներով նույն ժամանակով, կամ տուգանքով մեկ հազար հինգ հարյուրից մինչև երեք հազար դրամ:
«Բնապահպանական իրավախախտումների հետևանքով կենդանական և բուսական աշխարհին պատճառած վնասի սակագների մասին օրենքում արագիլին պատճառած վնասը գնահատվում է 1000 դրամ: Այդ օրենքն ընդունելու ժամանակ չեն մտածել, որ Հայաստանում կարող են վնասել արագիլին»,- ասաց Արթուր Բեգլարյանը:
Արթուր Բեգլարյանը կարծում է, որ այս դեպքից հետո սակագների վերանայում պիտի լինի: