Էրդողանն ահաբեկիչ է անվանել ԵԱՀԿ դիտորդական առաքելության անդամներին

Թուրքիայի նախագահ Ռեջեփ Թայիփ Էրդողանն ահաբեկիչ է անվանել ապրիլի 16-ի սահմանադրական հանրաքվեի ժամանակ Թուրքիա ժամանած ԵԱՀԿ դիտորդական առաքելության անդամներին:

Ինչպես գրում է թուրքական t24.com.tr կայքը, Էրդողանը շարունակել է հերքել ԵԱՀԿ դիտորդական խմբի զեկույցում գրանցված ընտրախախտումներն ու հայտարարել, որ ԵԱՀԿ դիտորդական խումբն ահաբեկիչների հավաքածու է, որը դիտորդի անվան տակ ներթափանցել է Թուրքիայի տարածք:

Թուրքիայի նախագահը, մասնավորապես, մատնանշել է այն փաստը, որ ԵԱՀԿ խմբի անդամները դրական են վերաբերվում Թուրքիայում ահաբեկչական ճանաչված «Քուրդիստանի աշխատավորական կուսակցություն» խմբավորմանը:

«Դրանք ԵԱՀԿ առաքելության անդամների դիմակով Թուրքիա ուղարկված ահաբեկիչներ են: Ձեռքին ՔԱԿ ահաբեկիչների դրոշը բռնած մեկի զեկույցն իսկապե՞ս հնարավոր է ընկալել որպես օբյեկտիվ արդյունք», - ասել է Էրդողանը:

Հիշեցնենք, որ ավելի վաղ ԵԱՀԿ առաքելությունը հայտնել է, որ Թուրքիայում անցկացված հանրաքվեն չի համապատասխանում Եվրոպայի խորհրդի նորմերին: Այս մասին ասվում է ԵԱՀԿ Ժողովրդավարական հաստատությունների և մարդու իրավունքների գրասենյակի դիտորդական առաքելության հայտարարությունում:

Նշենք, որ նախնական տվյալների համաձայն՝ Թուրքիայում սահմանադրական փոփոխությունների վերաբերյալ հանրաքվեում հաղթանակ են տարել կառավարման նախագահական համակարգի անցման կողմնակիցները՝ 51,41 տոկոս ձայնով: