Ավստրալիայում գողը կենդանաբանական այգուց կոկորդիլոս և պիթոններ է առևանգել (տեսանյութ)

Ավստրալիայի մայրաքաղաք Կանբերրայի կենդանաբանական այգիներից մեկում, որտեղ սողուններ են պահվում, «սառնասիրտ» գողը կոկորդիլոս և երկու պիթոն է առևանգել, գրում է Daily Mail-ը:

Դեպքը տեղի է ունեցել վաղ առավոտյան` տեղի ժամանակով ժամը 6:00-ի սահմաններում: Այգու ղեկավարությունը հրապարակել է անվտանգության տեսախցիկի արձանագրած կադրերը, որոնցում երևում է, թե ինչպես է տղամարդը լապտերով փնտրում ինչ-որ բան:

«Տեսագրությունից երևում է, որ գողը թիրախավորել է ցուցադրվող կենդանիներին՝ երկու պիթոններին ու կոկորդիլոսին: Նա միանգամից գործի է անցնում, բացի այդ՝ այնպիսի իրեր է իր հետ տարել, որոնք անհրաժեշտ են սողուններին պահելու ու խնամելու համար»,- ասել է այգու սեփականատեր և տնօրեն Պիթեր Չայլդը:

Նա մտավախություն է հայտնել, որ երիտասարդ կոկորդիլոսն առանց ճիշտ խնամքի երկար չի ապրի: Նա հավելել է, որ առևանգված սողուններից ոչ մեկն առանձնապես թանկարժեք չէ և հանրության համար վտանգ չի ներկայացնում:

«Կոկորդիլոսի մեջ միկրոչիպ կար, բացի այդ՝ կոկորդիլոս թաքցնելը հեշտ չէ, հուսով եմ՝ այն վաղ թե ուշ կհայտնվի: Որպես շահույթ չհետապնդող կազմակերպություն՝ սա հուզական առումով մեզ համար մեծ հարված է»,- խոստովանել է այգու տնօրենը:

Բաժանորդագրվեք Top-News.am-ին Telegram-ում