Ֆրանսիայում զորահանդեսի ժամանակ թռչող տախտակ է ցուցադրվել

Ֆրանսիայում ռազմական շքերթի ժամանակ ցուցադրվել է մի սարք, որն իրենից ներկայացնում է 5 ռեակտիվ շարժիչներով տախտակ: Շքերթի ընթացքում թռչող տախտակի հեղինակը թռչել է զորահանդեսի մասնակիցների վրայով:

Ի դեպ, տեղեկությունն այս մասին իր Twitter-ի էջում առաջինը հայտնել է Ֆրանսիայի նախագահ Էմանուել Մակրոնը: Գյուտարար Ֆրենկի Զապատայի ստեղծած սարքը կարող է զարգացնել մինչև 194 կմ/ժ արագություն:

Թռիչքից առաջ Զապատան ելույթ է ունեցել զորահանդեսին հետևող կառավարության անդամների, այդ թվում՝ նախագահ Մակրոնի առջև: Իսկ թռիչքի ժամանակ ձեռքում հրացան է պահել: Մակրոնին սարքը դուր է եկել: Զորահանդեսից հետո նա գրել է, որ հպարտանում է ֆրանսիական բանակով, ու այն համարում է ժամանակակից և ինովացիոն:

Հատկանշական է, որ 2018 թվականին Ֆրանսիայի բյուջեից 1․3 միլիոն եվրո է տրամադրվել Զապատային՝ իր տեխնոլոգիաները ավելի զարգացնելու և արդիականացնելու համար:

Բաժանորդագրվեք Top-News.am-ին Telegram-ում