Գախարիան խախտեց լռությունը. ի՞նչ է ասում Վրաստանի ՆԳ նախարարը

Վրաստանի ներքին գործերի նախարար Գիորգի Գախարիան արդեն 8 օր տևող ակցիաների ֆոնին, որոնց պահանջներից մեկը նախարարի հրաժարականն է, այսօր լրագրողների հետ հանդիպման ընթացքում խոսել է հունիսի 20-ի լույս 21-ի գիշերը ոստիկանների և ցուցարարների միջև տեղի ունեցած բախման մասին: Այս մասին հաղորդում է Aliq.ge-ն։

Գախարիայի խոսքով հունիսի 20-ի գիշերը ոստիկաններն օգտագործել են լեգիտիմ ուժ կիրառելու իրենց իրավունքը: Ինչ վերաբերում է համաչափ ուժ կիրառելուն, նախարարի խոսքով, կան որոշակի հարցեր և դրվագներ որոնք դեռ պետք է հետաքննվեն:

«Այն ամենը, ինչ տեղի ունեցավ հունիսի 20-ի գիշերը, սկզբից մինչև վերջ իմ պատասխանատվությունն է: Այս պատասխանատվությունից ես չեմ փախչում: Ինչպես նաև իմ պատասխանատվությունն է, այն ամենը ինչ մեր հանրությունում կատարվում է, երբ ժողովրդական դատարաններ ենք սարքում, դատում որոշ մարդկանց, այդ թվում ոստիկաններին»,- հայտարարել է Գախարիան:

Գախարիայի խոսքով, եթե միջադեպի ընթացքում եղել են համակարգային խախտումներ, նա պատրաստ է պատասխան կրել, սակայն թույլ չի տալու, որ իրավական պետության և ինստիտուտների փլուզում տեղի ունենա: ՆԳ նախարարի խոսքով՝ նա պաշտոնին կմնա այնքան ժամանակ, քանի դեռ չի համոզվել, որ ակցիան ցրելուն մասնակցած ոստիկաններից ոչ մեկն անարդարության զոհ չի դառնա:

Խոսելով ակցիան ցրելու ընթացքում կիրառված ռետինե փամփուշտների մասին, Գախարիան հայտարարել է, որ անթույլատրելի որևէ տեսակի փամփուշտ չի կիրառվել ակցիան ցրելու համար:

Ինչ վերաբերում է ՆԳ նախարարի՝ 8 օր հանրության առաջ դուրս չգալուն, Գախարիան պատասխանել է, որ չէր ուզում ավելորդ զայրույթ ու իրավիճակի թեժացում առաջացնել:

Վրաստանի խորհրդարանի շենքի դիմաց մեկնարկած թվով 8-րդ բողոքի ցույցի ժամանակ ակտիվիստները շարունակում են պահանջել Վրաստանի ներքին գործերի նախարար Գիորգի Գախարիայի հրաժարականը: Սա ցուցարարների 3 հիմնական պահանջներից վերջինն է, որը շարունակում է անբավարար մնալ: Մյուս երկու պահանջները՝ համամասնական ընտրություններ 2020 թվականից և հունիսի 20-ի գիշերը ձերբակալվածներին ազատ արձակելն իշխանությունը բավարարել է:

Այսօր ցուցարարները երթով շարժվում են դեպի իշխող «Վրացական երազանք» կուսակցության հիմնադիր, նախկին վարչապետ, մեծահարուստ Բիձինա Իվանիշվիլիի տուն: Հարկ է նշել, որ մինչ այս բողոքի ցույցերի շրջանակներում ցուցարարները երթերով շարժվել են կառավարության շենք, «Վրացական երազանք» կուսակցության գլխավոր գրասենյակ, ինչպես նաև ավտոերթով՝ դեպի Վրաստանի ներքին գործերի նախարարության գլխավոր մասնաշենք: