Հայ վիտինգ, ներդրում կապուտ. գերմանացի պատգամավորի ուշագրավ հայտարարությունը

Գերմանիայից կամ եվրոպական այլ երկրներից ներդրումներ կլինեն այն ժամանակ, երբ ներդրողները համոզված լինեն Հայաստանի դատական համակարգի թափանցիկության և անկախության մեջ։

Ծաղկաձորում ՀՀ մարդու իրավունքների պաշտպանի գրասենյակի և Կոնրադ Ադենաուերի հիմնադրամի կազմակերպած սեմինարի ժամանակ նման հայտարարություն է արել Գերմանիայի արտաքին քաղաքականության և անվտանգության հարցերի փորձագետ, Բունդեսթագի ՔԴՄ/ՔՍՄ խմբակցության պատգամավոր Քրիստիան Ֆորնեկը։ Ֆորնեկը զուգահեռներ է անցկացրել իր երկրի հետ և ընդգծել, որ Գերմանիայում դատարանների շենքերի արգելափակմանը որևէ մեկը դրական չէր վերաբերվի. «Գերմանիայում սովորաբար դատարաններ չեն արգելափակում։ Ոչ մի գործարար չի գա մի երկիր, եթե լսի, որ խոչընդոտում են դատարանների աշխատանքը։ Գործարարը միլիոններ է կորցնում, երբ դատական նիստը հետաձգվում է։ Ներդրողները պետք է վստահություն ունենան դատական համակարգի հարցում»,– ասել է Ֆորնեկը։

Փաստորեն եվրոպացի պատգամավորը տվել է մեզ բոլորիս և անձամբ վարչապետ Նիկոլ Փաշինյանին անչափ հուզող հարցի պատասխանը: Հարցը, թե ինչու արքատին ներդնողները չեն գալիս Հայաստանում աշխատելու, ունի շատ պարզ պատասխան` չեն գալիս, որորվհետև տեսնում են, որ Հայաստանում դատարաններն անկախ չեն, որ դատարանի աշխատանքը խոչընդոտվում է երկրի ղեկավարի կողմից, որովհետև դատարանի որոշումը միշտ պայմանավորված է օրենքի հետ կապ չունեցող այլ գործընթացների հետ: Կոնկրետ դատարանների շենքի շրջափակումը հենց այդպիսի օրինակ էր:
Հիշեցնենք, Արցախի նախկին և գործող նախագահներ Արկադի Ղուկասյանը և Բակո Սահակյանը երաշխավորություն ներկայացրին Ռոբերտ Քոչարյանի ազատ արձակման համար: Դատարանի` ՀՀ երկրորդ նախագահ Ռոբերտ Քոչարյանին ազատ արձակելու որոշումից հետո ՀՀ վարչապետ Նիկոլ Փաշինյանի կոչով մայիսի 20-ին մի քանի ժամով արգելափակվեցին դատարանների շենքերը, դատավորները չէին կարողանում մտնել դատարան, դատական բոլոր նիստերը չկայացան։ Հայաստանի օմբուդսմենը, Փաստաբանների պալատն ու Բարձրագույն դատական խորհուրդը հայտարարությամբ հանդես եկան` հորդորելով չմիջամտել դատական իշխանության աշխատանքին։
Նիկոլ Փաշինյանը հայտարարել է, որ Հայաստանի դատական համակարգը «վիրահատական միջամտության» կարիք ունի: Վիրահատական քայլերից են դատավորների վեթինգը, անցումային արդարադատության կիրառումը: Արդյոք այդ երկու գործընթացները կարող են նպաստել, որ դրսից, հատկապես Եվրոպայից Հայաստանում ներդրումներ արվեն: Գերմանացի պատգամավորն ասել է` նիխտ, քանի դեռ դատարաններն ազատ չեն, և նրանց որոշման վրա ով ասես` կարող է ազդել: Նիխտ ֆերշտե՞յն, հայ վիտինգ, ներդրում կապուտ:

hayeli.am