Իրանն առաջնահերթ ուշադրություն է դարձնում հարևան երկրների՝ մասնավորապես ՌԴ-ի և Ադրբեջանի հետ կապերին. Ռոհանի

Իրանի նախագահ Հասան Ռոհանին հայտարարել է, որ իր աշխատակազմն առաջնահերթ ուշադրություն է դարձնում հարևան երկրների՝ մասնավորապես Ռուսաստանի և Ադրբեջանի հետ կապերին, գրում է IRNA գործակալությունը:

Նրա խոսքով՝ վերջին տարիներին Ադրբեջանի և Ռուսաստանի հետ կապերը զգալիորեն բարելավվել են:

Իրանի նախագահը ելույթ է ունեցել հյուսիսային Մազանդարան նահանգում մի քանի նախագծերի բացման արարողությանը:

Նա հավելել է, որ Ռուսաստանի հետ ապրանքաշրջանառությունը վերջին իրանական տարվա ընթացքում (2015 թվականի մարտի 20-ից 2016 թվականի մարտի 20-ը) աճել է 80 տոկոսով՝ կանխատեսելով, որ իսլամական հանրապետության հյուսիսային Ամիրաբադ նավահանգստում նոր ենթակառուցվածքների ստեղծումը կնպաստի երկու երկրների միջև առևտրային կապերի հետագա ամրապնդմանը:

Իրանի նախագահը գովել է Ադրբեջանի հետ հարաբերությունների զարգացման մակարդակը՝ հավելելով, որ երկու երկրների առևտրային հարաբերություններն աճ կգրանցեն առաջիկա տարիներին:

Եվրասիական պետությունների հետ համատեղ ազատ առևտրի գոտիների հաստատումը զարգացրել է Իրանի հարաբերություններն այդ երկրների հետ, հավելել նախագահը:

Ռոհանին նշել է, որ արտահանման ոլորտում նոր համաձայնագրերի ստորագրումը կզարգացնի Իրանի հարաբերությունները եվրասիական երկրների հետ: