Չեխիան մտադիր է Ադրբեջանում ռազմական արտադրությո՞ւն հիմնել

2015 թվականից Չեխիան և Ադրբեջանը բանակցություններ են վարում ադրբեջանական տարածքում ռազմական նշանակության արտադրություն հիմնելու համար, և ժամանակն է անցնել գործնական քայլերի։ Այս մասին հայտարարել է Չեխիայի խորհրդարանի ստորին պալատի նախագահ Ռադեկ Վոնդրաչեկը։

Նա կարծիք է հայտնել, որ «Ceska Zbrojovka» ընկերությունը նմանատիպ ծրագրեր է իրականացնում արտերկրում ու կարող է արտադրություն հիմնել նաև Ադրբեջանում։ Պատգամավորի խոսքով՝ Ադրբեջանում արտադրվող ռազմական արտադրանքը կարող է սպառվել ինչպես Ադրբեջանում, այնպես էլ տարածաշրջանում։

Ավելացնենք, որ այս օրերին Ադրբեջանում է չեխական հենց այս ընկերության պատվիրակությունը, որն ադրբեջանական ՊՆ ղեկավարության հետ քննարկել է զենքի վաճառքի հարցեր։ Այս ընկերությունը, որի մասին ակնարկել է չեխ պաշտոնյան, զբաղվում է հրազենի՝ դիպուկահար ու ավտոմատ հրացանների, ատրճանակների, որսորդական զենքերի արտադրությամբ։

Ինչ վերաբերում է Չեխիային, այս պետությունը, չնայած եվրոպական արգելանքներին, չի խորշում միջնորդավորված ճանապարհներով զենք վաճառել Ադրբեջանին, ապա երդվել, որ իրենք տեղյակ չեն եղել, որ զենքերն Ադրբեջանի համար են նախատեսված եղել։ Վերջին տարիներին Չեխիան Ադրբեջանին վաճառել է Dana ինքնագնաց հրետանային համակարգեր ու Rapira համազարկային կրակի ռեակտիվ համակարգեր։