Բաքվում մոհիկանը Մահիկյանի հետ են շփոթել

Բաքվում մեծ սկանդալ է բարձրացել այն պատճառով, որ Facebook-ի օգտատերը մոհիկանը շփոթել է Մահիկյանի հետ։

Ինչպես հաղորդում է haqqin.az-ը՝ սոցկայքի օգտատերերն ակտիվորեն կիսում են մի աղջկա գրառումը, ով տեղադրել է գրախանութի ցուցափեղկի լուսանկարը, որտեղ ամերիկացի գրող Ջեյմս Ֆենիմոր Քուփերի «Վերջին մոհիկանը» վեպն է։ Աղջիկը ամերիկացի տեղաբնիկների՝ բրիտանացի գաղութարարների դեմ պայքարի մասին պատմավեպը շփոթել է ժամանակին հանրաճանաչ ռուսական «Վերջին Մահիկյանը» հեռուստասերիալի հետ։ Ի տարբերություն գրքի՝ հեռուստասերիալը Ռուսաստանում հայ ընտանիքի դժվարին կյանքի մասին է, որտեղ ավանդույթների առումով պահպանողական հայի դուստրն ամուսնանում է ռուս երիտասարդի հետ։

Տեղադրելով վերոնշյալ լուսանկարը՝ աղջիկը չի թաքցրել իր վրդովմունքը. «Ինչպե՞ս է մաքսայինը թույլատրել նման իրավիճակ՝ Բաքվի կենտրոնում հայերի մասին գիրք է վաճառվում»։ «Իսկ գիտեք, ես ընդհանրապես չէի զարմանա, եթե մաքսայինի որեւէ աշխատակից իսկապես արգելեր այդ գրքերի խմբաքանակի ներկրումը՝ հղում անելով այն նույն փաստին, ինչ վրդովված աղջիկը։ Չէ՞ որ Բաքվում դեպք է եղել, երբ ոստիկանությունը վահաբիստների շրջայցի ժամանակ ձերբակալել է մի երիտասարդի, ով Չե Գեւարայի պատկերով շապիկ էր կրում։ Ինչո՞վ կոմենդանտեն վահաբիստ չէր։ Դեմքի մորուքը շատ նման է։ Իսկ սոցհարցումներից մեկի ժամանակ Բաքվում ոչ ոք չճանաչեց Վլադիմիր Լենինին։ Կարելի է որքան հնարավոր է աշխատել այդ աղջկա ուղղությամբ, ով չի կարողանում մոհիկանը տարբերել Մահիկյանից, ոստիկանների ուղղությամբ, ովքեր շփոթում են Չե Գեւարային վահաբիստների հետ եւ առաջին անգամ են լսել հեղափոխության համաշխարհային առաջնորդի անունը։ Բայց իրականում Ադրբեջանում շատ ողբալի եւ վտանգավոր դրություն է ծավալվել՝ համազգային դեգրադացիայի եւ կրթական փտած համակարգի ֆոնին», - գրում է հոդվածի հեղինակը։