«Եվրոպան պետք է համոզի Իրանին մնալ միջուկային գործարքում». Մակրոն

Եվրոպան պետք է համոզի Իրանին մնալ միջուկային գործարքում, այս մասին հայտարարել է Ֆրանսիայի նախագահ Էմանուել Մակրոնը՝ Ռումինիայում Եվրամիության գագաթնաժողովի ժամանակ, գրում է ria.ru-ն:

«Մենք, անկասկած, դա հիմա քննարկելու հնարավորություն կունենանք: Ֆրանսիան ամենասկզբից աջակցել է մեր կողմից ստորագրված համաձայնագրին: Այդ համաձայնագիրը բավարար չէ, մենք կցանկանայինք լրացնել այն՝ հաշվի առնելով հրթիռային ոլորտում և տարածաշրջանում Իրանի գործունեությունը»,- ասել է Մակրոնը լրագրողների հետ զրույցում:

Նա նշել է, որ Ֆրանսիան ցանկանում է պահպանել իրանական միջուկային ծրագրի վերաբերյալ համաձայնագրի հիմքը: «Իրանը պետք է մնա պայմանագրում, իսկ մենք մեր հերթին պետք է ամեն ինչ անենք, որպեսզի դա տեղի ունենա»,- հավելել է Ֆրանսիայի նախագահը:

Ավելի վաղ Իրանը նամակ էր ուղարկել իրանական միջուկային ծրագրի վերաբերյալ համաձայնագրի անդամ 5 երկրի՝ տեղեկացնելով պարտավորությունների մի մասի կատարման դադարեցման մասին:

Իրանի առաջնորդն ընդգծել է, որ միջուկային ծրագրի «վերջը դեռ չի եկել»: Սակայն Թեհրանն իրեն պարտավոր չի համարում հետևելու բոլոր սահմանափակումներին և փոխում է համաձայնագրի երկու կետերի գծով վարած քաղաքականությանը: Դրանք վերաբերում են հարստացված ուրանի ու ծանր ջրի պաշարների պահմանը:

Իրանը 60 օր է տվել 5 գործընկերներին, որպեսզի իրականացվեն Թեհրանի շահերի ապահովման գծով բոլոր պարտավորությունները, այդ թվում՝ բանկային ու նավթային ոլորտներում:

Հիշեցնենք, որ 2015 թվականին Իրանն ու միջազգային «միջնորդ վեցյակը»՝ Ռուսաստան, ԱՄՆ, Մեծ Բրիտանիա, Չինաստան, Ֆրանսիա, Գերմանիա, ձեռք էին բերել իրանական միջուկային ծրագրի շուրջ պատմական համաձայնություն:

Ընդունվել է Գործողությունների համատեղ համապարփակ ծրագիր, որի դրույթներին հետևելն ազատել էր Իրանին իր նկատմամբ ՄԱԿ-ի ԱԽ-ի, Եվրամիության ու ԱՄՆ-ի սահմանած տնտեսական ու ֆինանսական պատժամիջոցներից:

2018 թվականի մայիսին ԱՄՆ նախագահ Դոնալդ Թրամփը հայտարարել էր, որ Վաշինգտոնը դուրս է գալիս համաձայնագրից, ինչպես նաև հայտնել, որ ԱՄՆ-ն վերականգնում է Իրանի նկատմամբ սահմանած բոլոր պատժամիջոցները, այդ թվում՝ այն երկրների նկատմամբ սահմանած, որոնք բիզնես են վարում Իրանի հետ:

«Հնգյակն» ու Թեհրանը պայմանավորվել են մշակել ֆինանսական մեխանիզմ՝ ԱՄՆ-ի պատժամիջոցները շրջանցելով հաշվարկներ իրականացնելու համար:

Այս թեմայով Իրանը խոստացել է դուրս չգալ միջուկային ծրագրից Իրանը Եվրոպային 60 օր է տվել Եվրոպան Իրանին կոչ է անում պահպանել միջուկային համաձայնագիրը Իրանը նամակ է հղել «միջնորդ հնգյակին» և հայտնել իրանական միջուկային գործարքից մասամբ դուրս գալու մասին Եվրոպան կվերականգնի Իրանի դեմ պատժամիջոցները, եթե Թեհրանը հրաժարվի միջուկային համաձայնագրից