Զուրաբիշվիլին աննպատակահարմար է համարում Վրաստանում ամերիկյան բազաների տեղակայումը

Վրաստանի նախագահ Սալոմե Զուրաբիշվիլին նպատակահարմար չի համարում երկրում ամերիկյան ռազմակայանների տեղակայումը: Այս մասին Վրաստանի նախագահը հայտարարել է «Ամերիկայի ձայն» ռադիոկայանի վրացական ծառայության հետ զրույցում:

«Այս երկիրը մի վայրում է, որտեղ պետք է ամրապնդել անվտանգությունը: Անհրաժեշտություն չկա դիմել այնպիսի քայլերի, որոնք կարող են ընկալվել որպես սադրանք: Միևնույն ժամանակ, ես չեմ կարծում, թե Միացյալ Նահանգները պատրաստ է այստեղ ունենալ ռազմակայան, որը կգրավի ոչ միայն Ռուսաստանի, այլ նաև ահաբեկչական շարժումների ուշադրությունը, որոնք շատ ակտիվ են մեր տարածաշրջանում», - հայտարարել է նախագահ Զուրաբիշվիլին:

Վրաստանի ընդդիմությունը խստորեն քննադատել է նախագահի հայտարարությունը:

«Եվրոպական Վրաստան» խորհրդարանական կուսակցության առաջնորդներից Գիգա Բոկերիան, ով նախկինում զբաղեցնում էր Ազգային անվտանգության խորհրդի քարտուղարի պաշտոնը, հայտարարել է, որ Զուրաբիշվիլիի այդ հայտարարությունը ձեռնտու է Վլադիմիր Պուտինին:

Ընդդիմադիր պատգամավոր Դավիթ Բաքրաձեն Զուրաբիշվիլիի թեկնածությունն առաջադրած իշխող «Վրացական երազանք»-ից է բացատրություններ պահանջել: Բաքրաձեի կարծիքով՝ նախագահի խոսքերը հակասում են ՆԱՏՕ-ին անդամակցության հարցով Վրաստանի ստանձնած պարտավորություններին: «Այդ հայտարարությունը ուղղակի ջուր է լցնում Ռուսաստանի ջրաղացին, որը պարբերաբար պնդում է, թե Վրաստանը չի կարող արևմտյան անվտանգության համակարգի մաս լինել», - ասել է ընդդիմադիր պատգամավորը: