Որեւէ կլանային համակարգում չեմ եղել, բիզնեսով չեմ զբաղվել. ՊՎԾ պետի տեղակալը չբացահայտեց ահռելի հարստության աղբյուրը

Պաշտոնապես հայտարարում եմ, որ որեւէ կոռուպցիոն սկանդալում չեմ եղել, որեւէ կլանային համակարգում չեմ եղել, բիզնեսով չեմ զբաղվել։ Այս մասին այսօր՝ ապրիլի 25-ին, լրագրողների հետ զրույցում ասաց Պետական վերահսկողական ծառայության ղեկավարի տեղակալ Արգիշտի Քյարամյանը՝ անդրադառնալով իր ունեցվածքի մասին հարցին։

«Ես աշխատել եմ տարբեր ուժային կառույցներում, զբաղեցրել եմ տարբեր պաշտոններ եւ պաշտոնապես հայտարարում եմ, որ երբեւէ կոռուպցիոն սկանդալում չեմ եղել, որեւէ կլանային համակարգում չեմ եղել, ոչ էլ բիզնեսով եմ զբաղվել»,–ասաց նա։

Հարցին՝ այդ դեպքում որտեղից իրեն 32մլն դրամ, 48 հազար դոլար, 6000 դոլար, նա պատասխանեց. «Ես կոռեկտ չեմ համարում իմ ունեցվածքը քննարկել»։

Նշենք, որ չնայած երիտասարդ տարիքին (28 տարեկան) եւ պետական մարմիններում աշխատելու փորձին՝ Քյարամյանը ահռելի հարստության տեր է։ Բարձրաստիճան պաշտոնատար անձանց էթիկայի հանձնաժողովի կայքում տեղադրված էին նրա 2017թ հայտարարագրերը։ Ըստ այդմ՝ թեմի առաջնորդի որդին ստացել է 4,674,807.0 աշխատավարձ, նրա դրամական միջոցները 2017թ հարկային տարում կազմում էին 32մլն դրամ, 48 հազար դոլար, 6000 դոլար փոխառություն։ Երեւանի դատախազի պաշտոնը ստանձնելու ժամանակ երիտասարդը ունեցել է 4 հողամաս, երկու բնակելի տուն՝ հողամասի վրա կառուցված, հողին ամրակայված այլ շինություն, ավտոտմակ, MERCEDES-BENZ C 180 մեքենա, ինչպես նաեւ թանկարժեք զարդեր։