Ուժի մեջ է մտել Վրաստանի և ԵՄ-ի միջև անայցագրային ռեժիմը

Վրաստանի և Եվրոպական միության երկրների միջև անայցագրային ռեժիմն այսօրվանից ուժի մեջ է մտել, հայտնում է ria.ru-ն:

Մարտի 28-ից Վրաստանի քաղաքացիները կկարողանան կենսաչափական անձնագրերով առանց վիզայի կարճաժամկետ այցեր կատարել ԵՄ։ Աղբյուրը մանրամասնում է, որ միակ եվրոպական երկրները, որոնց պարագայում անայցագրային ռեժիմը չի գործի, Մեծ Բրիտանիան և Իռլանդիան են:

Վրաստանի արտաքին քաղաքական գերատեսչությունում հայտնել են, որ անայցագրային ռեժիմից կարող են օգտվել նաև Աբխազիայի և Հարավային Օսիայի այն բնակիչները, որոնք ունեն վրացական կենսաչափական անձնագրեր:

Վրաստանի արտգործնախարարությունը երեկ նշել է Եվրամիության հետ առանց վիզայի ռեժիմի ուժի մեջ մտնելու կարևորությունը և ներկայացրել Եվրամիության անդամ դառնալու վեց կետից բաղկացած գործողությունների ծրագիր՝ ԵՄ-ի հետ ասոցացման համաձայնագրի շրջանակներում ինստիտուցիոնալ և օրենսդրական բարեփոխումների հաջող իրականացում, Եվրամիության մասնագիտացված գործակալություններին առավելագույն ինտեգրում, Եվրամիության ծրագրերին Վրաստանի մասնակցության արդյունավետության մեծացում, Եվրամիության կառույցների հետ բանակցությունների փուլից համագործակցության փուլի անցում, պաշտպանության և անվտանգության ոլորտներում երկխոսության խորացում, Եվրամիության ներքին շուկային ֆիզիկական ինտեգրում, ինչը ենթադրում է տրանսպորտային, էներգետիկ, հաղորդակցային ինտեգրում:

tert.am