«Թուրքիայի գրանցած տնտեսական աճը որակյալ աճ չէ, և եթե չլինեն լուրջ բարեփոխումներ, ճգնաժամն է՛լ ավելի կխորանա». Աջեմօղլու

Ծնունդով Թուրքիայից աշխարհահռչակ հայազգի տնտեսագետ Տարոն Աջեմօղլուն մասնակցել է Թուրքիայում Ուլուդաղի տնտեսական համաժողովին, որի շրջանակում լրագրողների հետ զրույցում գնահատականներ է տվել Թուրքիայի տնտեսության ներկա վիճակին:

Ըստ Աջեմօղլուի՝ Թուրքիայի գրանցած տնտեսական աճը որակյալ աճ չէ, և եթե չլինեն լուրջ բարեփոխումներ, ճգնաժամն է՛լ ավելի կխորանա:

«Աճում է շինարարության բնագավառը: Շատ լավ, իսկ դա ինչի՞ց է գալիս: Միմիայն վարկերից: Վարկ ենք տալիս, սպառումը մեծանում է: Արդյունաբերության մեջ ներդրումներ չկան: Նման պայմաններում էլ արդյունավետության գործոնը չի մեծանում: Իսկ բարձրորակ աճը վարկերի ճիշտ օգտագործումից է գալիս», - նշել է Աջեմօղլուն՝ նկատելով, որ փոխարենը կրթության և առողջապահության ոլորտները Թուրքիայում հետընթաց են ապրում:

Ըստ նրա՝ առանց ժողովրդավարական միջավայրի տնտեսական որակյալ աճի հասնելն անհնարին է:

«Ժողովրդավարական երկրներում վարկերից գոյացած եկամուտն աճում է և օգտագործվում առողջապահական, կրթական բնագավառներում: Մինչդեռ բռնապետության դեպքում այդպես չէ, քանի որ իշխանությունը ներդրումները վստահում է իր շրջապատի անձանց ու նրանցից էլ հարկ չի կարող պահանջել», - ընդգծել է հայազգի տնտեսագետը:

Ավելի վաղ Աջեմօղլուն հայտարարել էր, որ ժողովրդավարական բարեփոխումներն ու, մասնավորապես, քաղբանտարկյալների ազատ արձակումը, մամուլի ազատության ապահովումն ու Կենտրոնական բանկի անկախ լինելն անմիջական կապ ունեն տնտեսության առողջացման հետ և պետք է առաջնային քայլեր դառնան Թուրքիայի իշխանությունների համար։