Փաշինյանը Լուսինե Բադալյանի աղմկահարույց գրառման մասին հարցին ի պատասխան խոսեց «ֆեյք նյուզերի» մասին

Մենք գիտենք, որ մամուլի ազատությանը չի կարելի կպնել, մամուլի դեմ հետապնդումներ չի կարելի անել. մենք հիմա աշխատում ենք տարբեր կազմակերպությունների հետ, որպեսզի Հայաստանում մամուլի աջակցության հիմնադրամ ձեւավորվի՝ կառավարությունից անկախ: Այս մասին այսօր՝ մարտի 19-ին, իր ասուլիսում հայտարարեց ՀՀ վարչապետ Նիկոլ Փաշինյանը:

«Բյուջեի միջոցներով չենք անում, որովհետեւ կստացվի, որ ուզում ենք վերահսկողության տակ վերցնել լրատվամիջոցներին: Ուզում ենք չեզոք գործընկերների ներգրավելուվ Հայաստանում մամուլի աջակցության հիմնադրամ ստեղծել, որ այդ հիմնադրամը որոշակի ֆինանսական աջակցություն ցուցաբերի լրատվամիջոցներին»,-ասաց նա:

Մասնավորապես, «Հրապարակ»-ի լրագրողը նկատեց, որ իշխող ուժը ներկայացնող խմբակցության անդամներից շատերը հանդես են գալիս մամուլի դեմ հայտարարություններով, բաժանումներ են անում իշխանական մամուլի, սիրելի մամուլի, իրենց համար ոչ սիրելի կամ հակահեղափոխական մամուլի:

«Պատգամավոր Լուսինե Բադալյանն իր գրառման մեջ լրատվամիջոցների ցանկ էր առանձնացրել, կոչ էր անում հարցազրույց չտալ այլ լրատվամիջոցների: Ինչպե՞ս եք սա գնահատում, երբ դուք էլ երբեմն ձեր ուղիղ եթերներում առանձին լրատվամիջոցների եւ հրապարակումների քննադատաբար անդրադառնում ենք»,-հարց ուղղեց լրագրողը:

Փաշինյանը ասաց, որ նշված գրառումն ինքը չի տեսել և Լուսինե Բադալյանի գրառումը մեկնաբանելու փոխարեն խոսեց ֆեյք նյուզերի մասին։ «Այսօր ամբողջ աշխարհում կա «ֆեյք նյուզի» հետ կապված գլոբալ խնդիրը: Դա վերաբերում է ամբողջ աշխարհին, հատկապես քաղաքակիրթ աշխարհին, որտեղ չկա ինտերնետի ցենզուրա: Շատ դեպքերում, երբ կան քաղաքական սահմանափակումներ, մենք չենք կարող մամուլի ազատության դեմ որեւէ բան անել, բայց նաեւ մարդիկ չեն կարող լրիվ անպաշտպան մնալ: Իրենք իրենց պաշտպանելու ինչ-որ ձեւեր են գտնում: Դա ոչ թե արշավ է մամուլի դեմ, այլ գործընկերության հրավեր է, որ եկեք փոխադարձ հարգանքի մթնոլորտ ձեւավորենք, նորմալ իրար հետ աշխատենք: Ես այդպես եմ ընկալում»:

Դիտարկմանը, որ երբ կոչ են անում լրատվամիջոցներին հարցազրույց չտալ, առանձնացնում են լրատվամիջոցներին, արդյոք դա գործընկերայի՞ն մոտեցում է, և ինչպե՞ս է լինում, որ հեղափոխությունը լուսաբանած, նախկին իշխանություններին քննադատած լրատվամիջոցները այսօր հայտնվում են նոր իշխանությունների թիրախում, վարչապետն արձագանքեց. «Դե որովհետեւ հեղափոխությունից հետո լրատվական դաշտում մեծ առուծախի պրոցես է տեղի ունեցել, դուք դրանից տեղյակ չե՞ք:

Ես ձեր ասած վերջին գրառումները չեմ տեսել, բայց համարում եմ, որ ձեր բարձրացրած մտահոգությունը լեգիտիմ մտահոգություն է, բայց իմ ասածն այն է, որ այս ամենից հետո պետք է արձանագրենք, որ խնդիր կա: Հիմա մենք ուզում ենք այդ խնդիրը իրար հետ լուծե՞նք, թե չենք ուզում: Թե՞ պետք է շարունակենք այդ ռեժիմը, որ մեկ լրատվամիջոցներն են քաղաքական գործիչներին բոյկոտում, մեկ՝ հակառակը: Ես կարծում եմ, որ այս հարցը պետք է լուծվի երկխոսության միջոցով, կոնսենսուսային դաշտ ձեւավորելու միջոցով:

Որեւէ մեկը կասկած չունենա, որ մամուլի ազատության հետ կապված Հայաստանում որեւէ պրոբլեմ չի լինելու: Ուզում է՝ բոլոր լրատվամիջոցները մեկ սեփականատեր ունենա, մենք հակամամուլային գործողություն չենք անելու, բացառությամբ այն դեպքերի, երբ ուրիշ հարցեր կծագեն: Օրինակ, կարող է օրենքի կոպիտ խախտում լինի, որը չենք կարող չարձագանքել:

Օրինակ, տեսանք, որ քրգործ է հարուցվել նախաքննական նյութեր հրապարակելու կապակցությամբ: Էդ էլ «լավ է», որ քրգործը հարուցված է մի լրատվամիջոցի նկատմամբ, որի գլխավոր խմբագիրը «Իմ քայլը» խմբակցության պատգամավոր է: Հակառակ դեպքում, պատկերացնում եք, թե ինչ աղմուկ կլիներ:

Առանձին վերցրած պատգամավորը, վարչապետը, լրատվամիջոցը այդ հարցի լուծումը չունի: Հերիք է, ինչքան հակամարտության կանխավարկածով ենք գնում, որովհետեւ իրականում հակամարտության հարց չկա»,- ընդգծեց Փաշինյանը:

Նա նաեւ հիշեցրեց, որ երբ վերջերս խմբագրությունների կողմից վարձակալության խնդիր էր եղել, իրեն տեղեկացրել էին, որ մամուլում քննարկվում է, որ դա վարչապետի վրեժն է մամուլից. «Ժողովուրդ ջան, խնդրում եմ, եկեք դուրս գանք այդ տրամաբանությունից, դա սխալ ընկալում է, այդպես չէ իրականությունը: Ես որեւէ մեկից ոչ վրեժխնդիր եմ եղել, ոչ էլ դրա անհրաժեշտությունն ունեմ: Եթե վրեժխնդիր լինելու հարց լիներ, դրա համար ամենահարմար պահը, առիթը, զրո խոչընդոտ... Վրեժխնդիր լինելու համար էնքան գործիք կա, 5 րոպեում կարելի էր բոլորից վրեժխնդիր լինել, եթե նման նպատակ լիներ»:

Նշենք, որ, «Իմ քայլը» խմբակցության պատգամավոր Լուսինե Բադալյանն օրերս ֆեյսբուքյան գրառում էր արել, որ կոչ էր արել դիտել միայն «Ազատություն» և Հանրային հեռուստատեսություն, կարդալ միայն «Հայկական ժամանակ»։ Հնչած քննադատություններից հետո պատգամավորը մի քանի անգամ խմբագրել էր իր գրառումը։

Այս թեմայով Կոչ եմ անում կազմակերպել բողոքի ակցիաներ. Փաշինյան Պեսկով․ Փաշինյանի այցը Մոսկվա կարող է կայանալ արդեն մոտ ժամանակում ԵԱՏՄ, ԵՄ և հանրաքվե. Ի՞նչ են քննարկել Փաշինյանն ու Պուտինը Փաշինյանն ու Ալիևն ընդգծել են TRIPP-ի շրջանակներում կապակցվածության նախագծերի կարևորությունը Ինչպիսին էլ լինեն լուծումները, դրանք պետք է տեղավորվեն ինքնիշխանության, տարածքային ամբողջականության, իրավազորության սկզբունքների շրջանակում․ Փաշինյան