Վրացական կողմը չի հաստատում

Վրացական կողմը ուսումնասիրում է Վրաստանից Հայաստան շարժական «Իգլա» տեսակի զենիթա–հրթիռային համակարգի տեղափոխման վերաբերյալ տեղեկատվությունը,-   հայտարարել է Վրաստանի ՆԳ նախարար Գեորգի Մհեբրիշվիլին։

Նախօրեին Հայաստանի հատուկ ծառայությունները հայտարարել էին մաքսանենգ ճանապարհով Վրաստանից Հայաստան «Իգլա» տեսակի զենիթա–հրթիռային համակարգի համալրող մասերի տեղափոխման վերաբերյալ։

Հայաստանի Ազգային անվտանգության ծառայությունից հաստատում են, որ օպերատիվ–հետախուզական միջոցառումների արդյունքում բեռնատար մեքենայում հայտնաբերվել են «Իգլա» տեսակի զենիթա–հրթիռային համակարգի արձակման խողովակ՝ «9M39» հրթիռով։

«Չի կարելի միանշանակ ասել, որ դա Հայաստան է հասել Վրաստանի ճանապարհով։ Դե հնարավոր է, նրանք այդպես են ասում, բայց մենք ճշտում ենք մանրամասները եւ անպայման հանրությանը կհայտնենք այդ մասին»,– ասել է Մհեբրիշվիլին լրագրողներին։

Վրաստանի խորհրդարանի պաշտպանության եւ անվտանգության հանձնաժողովի նախագահ Իրաքլի Սեսիշվիլին իր հերթին հաղորդել է, որ վրացական կողմը ստուգում է «Իգլա» ԶՀՀ–ի Վրաստանից տեղափոխման մասին ամբողջ տեղեկատվությունը, եւ Հայաստանի անվտանգության ծառայությունների հետ կապի մեջ է գտնվում։ 

«Արդեն երկար տարիներ չեն եղել նման միջադեպեր։ Մեր անվտանգության ծառայությունները կապի մեջ են հայ գործընկերների հետ։ Հետաքննություն է ընթանում, եւ մինչեւ դրա ավարտը մեր կողմից մեկնաբանություններ անելը անլրջություն կլինի։ Սպասենք հետաքննության արդյունքներին։ Մենք ունենք տեխնիկական հնարավորություն, որոշելու համար, արդյոք սյդպիսի բան եղել է, թե՝ ոչ, այդ պատճառով ավելի լավ է սպասենք հետաքննության արդյունքներին եւ միայն դրանից հետո կառավարական կառույցները համապատասխան հայտարարություն կանեն»,– ասել է Իրաքլի Սեսիշվիլին՝ մամուլի ասուլիսի ժամանակ։

Խորհրդարանական ընդդիմության ներկայացուցիչները գտնում են, որ ստեղծված իրավիճակը պետական անվտանգության ծառայությունների վատ աշխատանքի հետեւանք է։
«Պետանվտանգության կառույցները ոչինչ չգիտեն այն մասին, որ զենիթային համակարգը Վրաստանից Հայաստան է ներկրվել։ Ցավում եմ, բայց դա նշանակում է որ երկրում չկա պետական անվտանգություն։ Այժմ նրանք պետք է հասկանան, թե ինչ է կատարվում երկու երկրների միջեւ։ Հայաստանի ՆԳՆ–ն հայտարարում է, որ այդ համակարգը բերվել է Վրաստանի տարածքից եւ բացահայտվել է դե–ֆակտո Ղարաբաղի տարածքում։ Մնացածը պետք է պարզել։ Առաջին հերթին Վրաստանի կառավարությունը պետք է պարզի, արդյոք այդ համակարգը բերվել է Վրաստանի տարածքով»,– ասել է «Եվրոպական վրաստան» կուսակցության պատգամավոր Թենգիզ Գունավան։

«Իգլա» տեսակի ԶՀՀ–ի Վրաստանից Հայաստան տեղափոխման վերաբերյալ տեղեկության հայտնվելուց մի քանի ժամ առաջ «Միացյալ ազգային կուսակցությունը» ենթադրություններ է արել, որ Բոլնիսի շրջանից Հայաստան՝ ռուսական ռազմական տեխնիկա է տեղափոխվում։

Ըստ «Միացյալ ազգային կուսակցության» տվյալների՝ ռուսական համարանիշներով մեքենաները դեպի Հայաստանի հետ սահման են բերում բեռ, որը փաթեթավորված վիճակով նման է «Բուկ» համակարգերին։ Կուսակցությունը դիմել է իշխանություններին՝ ճշտելու բեռի նշանակությունը։ Ավելի ուշ պաշտպանության նախարարությունում այդ տեղեկատվությունը բնութագրել էին որպես՝ «իրականությանը չհամապատասխանող»։

Այսօր Վրաստանի կառավարության անդամները հերքել են Ռուսաստանից Վրաստանի տարածքով դեպի Հայաստան ռազմական տեխնիկայի տեղաշարժման վերաբերյալ տեղեկատվությունը։

«Տեղեկատվությունը այն մասին, իբր ինչ որ ռազմական տեխնիկա է շարժվում Վրաստանի տարածքով՝ իրականությանը չի համապատասխանում։ Այդպիսի տեղեկատվություն են տարածում Վրաստանի թշնամիները, ովքեր ուզում են որպեսզի մեր բարեկամական հարաբերությունները լարվեն։ Արտասահմանյան ռազմական տեխնիկա Վրաստանի տարածքով չի անցել»,– ասել է տարածքային զարգացման նախարար Զուրաբ Ալավիձեն։

Top-News.am