«Վրաստանը ցանկանում է գազի մի քանի մատակարար ունենալ և բանակցություններ է վարում Ռուսաստանի հետ». Գիորգի Քոբուլիա

Վրաստանի իշխանությունները Ռուսաստանի հետ գազի գնման շուրջ բանակցություններ են վարում, գրում է «Վզգլյադ» թերթը՝ հավելելով, որ ավելի վաղ նշվել էր, որ երկրի պահանջներն ամբողջությամբ բավարարում է Ադրբեջանից մատակարարվող գազը:

«Այո, մենք Ռուսաստանի հետ բանակցություններ ենք վարում: Հնարավոր է, որ Ռուսաստանից որոշակի ծավալով գազ գնենք, ինչը մեզ էներգետիկ անվտանգությունն ու անկախությունը պահպանելու հնարավորություն կընձեռի»,- խորհրդարանական լսումների ժամանակ հայտարարել է Վրաստանի էկոնոմիկայի և կայուն զարգացման նախարար Գիորգի Քոբուլիան:

Նախարարը հավելել է, որ իրենք ցանկանում են գազի մի քանի մատակարար ունենալ, քանի որ այդ կերպ «գազի համար մրցակցային գին և դիվերսիֆիկացիա կլինի»:

Նախարարի խոսքով՝ Ռուսաստանի հետ բանակցությունները բարդ են և ժամանակ են պահանջում, քանի որ վրացական կողմը պայմանների բարելավում է ակնկալում:

Քոբուլիան խորհրդարան էր հրավիրվել «Գազպրոմ» ընկերության հետ բանակցությունների մասին խոսելու: Նա հստակ չի հայտնել, թե ինչ ծավալի գազի գնման մասին է խոսքը:

Ինչպես նշում է թերթը, ավելի վաղ Վրաստանը ռուսական գազը Հայաստան տեղափոխելու համար ստանում էր իր տարածքով անցած գազի ծավալի 10%-ը, սակայն մեկ տարի առաջ համաձայնել էր վճարի դրամայնացմանը: Այն ժամանակ կառավարությունից խոստովանել էին, որ նման պայմանագիրը պակաս շահեկան է, սակայն իրենք ստիպված են եղել այն կնքել:

Ընդդիմադիր «Միացյալ ազգային շարժում» կուսակցության պատգամավոր Ռոման Գոցիրիձեն նշել էր, որ Վրաստանը մինչև դրամայնացումը ռուսական գազի տեղափոխումից 200 մլն խորանարդ մետր գազ էր ստանում, որը դրամական հաշվարկով 40 մլն դոլարի է համարժեք, իսկ այժմ Վրաստանին տարանցման համար 11 մլն դոլար է վճարվում:

Պատգամավորը հավելել էր, որ ընթացիկ տարվա համար տարանցման վերաբերյալ պայմանագիր դեռևս չկա, ինչը նշանակում է, որ Վրաստանն արդեն ամիս ու կես առանց շահի գազ է տեղափոխում Հայաստան: