Թուրքիայում անհայտ անձինք հարձակվել են ընդդիմադիր կուսակցության նախընտրական շտաբի վրա, կան վիրավորներ

Ստամբուլի Էյուփսուլթան շրջանում անհայտ անձինք հարձակում են գործել ընդդիմադիր Ժողովրդահանրապետական կուսակցության նախընտրական շտաբի շենքի վրա, միջադեպի հետևանքով տուժել է 3 մարդ, հաղորդում է diken.com.tr կայքը:

Կուսակցության՝ Ստամբուլի գլխավոր շտաբի ղեկավար Ջանան Քաֆթանջըօղլուն լրագրողների հետ զրույցում մանրամասնել է, որ վիրավորներն Էյուփսուլթանի շրջանում իրենց նախընտրական շտաբի նախագահն ու ղեկավար կազմի երկու անդամներն են, նրանք տեղափոխվել են հիվանդանոց:

Քաֆթանջըօղլուն նաև նշել է, որ հարձակված անձանց ինքնության մասին իրենք առայժմ տեղեկություններ չունեն, ոստիկանությունը շարունակում է զննել դեպքի վայրը: Զենքի կիրառման մասին տեղեկությունները նույնպես հստակ չեն:

Անցյալ տարի Թուրքիայում տեղի ունեցած արտահերթ նախագահական ու խորհրդարանական ընտրություններից առաջ նախընտրական քարոզարշավի ընթացքում հարձակումների են ենթարկվել քրդամետ Ժողովրդադեմոկրատական, ընդդիմադիր Ժողովրդահանրապետական ու «Լավ» կուսակցությունների տասնյակ անդամներ:

Հարձակումները գրանցվել էին Ստամբուլում, Էրզրումում, Էլյազըղում, Անկարայում, Բուրսայում, Անթալիայում, Դիարբեքիրում, Մանիսայում, Մարդինում, Բոլուում, Բաթմանում և Հաթայում։ Ընդ որում՝ Ստամբուլում և Էրզրումում հարձակումները կրկնվել են պարբերաբար։ Լրատվամիջոցները նշել էին նաև նախընտրական շրջանում քարոզչական աշխատանքներ տանող 208 կուսակցականի ձերբակալության մասին։

Այս տարի Թուրքիայում տեղական ինքնակառավարման մարմինների ընտրություններ են նախանշված մարտի 31-ին: