Դա իսկական պատերազմի պատճառ է. Չավուշօղլուն՝ Նիդեռլանդների քայլի մասին

Թուրքիայի արտաքին գործերի նախարար Մևլութ Չավուշօղլուն հայտարարել է, որ Նիդեռլանդների արած քայլը Թուրքիայի հանդեպ իսկական պատերազմի պատճառ է, գրում է թուրքական diken.com.tr կայքը:

«Դա պատերազմի պատճառ է: Ինչի՞ համար ես սա անում: Խնդիրը ո՞րն է: Մենք ձեր երկրի ներքին հարցերի՞ն ենք խառնվել: Ձեր ռազմական բազա՞ն ենք մտել», - ասել է Չավուշօղլուն՝ նշելով, որ բազմաթիվ եվրոպական երկրներ քննադատում են Նիդեռլանդների քայլը, սակայն չեն համարձակվում բարձրաձայնել այդ մասին:

«Սրանք Նիդեռլանդներին տեր են կանգնում, որովհետև Եվրամիության անդամ են: Բազմաթիվ մարդիկ ինձ զանգահարեցին ու ասացին, որ Նիդեռլանդների քայլն անընդունելի է: Հետո այդ նույն մարդիկ Նիդեռլանդներին աջակցող հայտարարություններ արեցին: Նշանակում է, որ իրենք իրենց կամքով չեն այդպիսի հայտարարություններ անում», - ասել է թուրք նախարարը:

Վերջին շրջանում Թուրքիայի հարաբերությունները սրվել են եվրոպական մի քանի երկրների՝ այդ թվում Նիդեռլանդների հետ։ Հիշեցնենք, որ մարտի 11-ին Նիդեռլանդների վարչապետը թույլ չէր տվել, որպեսզի Թուրքիայի ԱԳ նախարար Մևլութ Չավուշօղլուի օդանավը վայրէջք կատարի Ռոտերդամում, որտեղ նա մտադիր էր Թուրքիայում կայանալիք սահմանադրական բարեփոխումների հանրաքվեի թեմայով հանրահավաք անցկացնել տեղի թուրքերի հետ:

Նույն նպատակով, սակայն արդեն ցամաքային ճանապարհով, Նիդեռլանդներ էր մեկնել Թուրքիայի ընտանիքի հարցերով նախարար Ֆաթմա Բեթյուլ Սայյան Կայան, որի մեքենան կանգնեցրել են Ներքին գործերի նախարարության աշխատակիցները՝ թույլ չտալով առաջ շարժվել: Այնուհետև Նիդեռլանդների իշխանությունները նրան «անցանկալի անձ» են հայտարարել ու արտաքսել երկրից: