Բիթլիսում դպրոցի վերակառուցման աշխատանքների ժամանակ գտնվել են հայկական եկեղեցու սրբատաշ քարեր

Թուրք ուսումնասիրող Սեդաթ Ուլուգանան ահազանգել է, որ այժմյան Թուրքիայի տարածքում գտնվող Բիթլիս նահանգի Ադըլջևազ (պատմական Արծկե-tert.am) շրջանի գյուղերից մեկում շինարարական աշխատանքների ժամանակ գտնվել են տեղի հայկական եկեղեցիներից մեկի քարերը: Այդ մասին նա հայտնել է Ստամբուլում հրատարակվող հայկական պարբերականներից «Ակօս»-ին:

Եկեղեցին, որի անունը չի նշվում, ըստ Ուլուգանայի, վերջնականապես ավերվել է 1950 թվականին, սրբատաշ քարերը բնակիչներն օգտագործել են տների ու դպրոցի գյուղի շինարարության մեջ: Այժմ դպրոցի վերակառուցման աշխատանքների ժամանակ ի հայտ են եկել քարեր, որոնք ուսումնասիրողը ջանում է պահպանության տակ առնել:

Ուլուգանան նշել է, որ տպավորիչ փորագրություններով եկեղեցական սրբատաշ քարերը ոչնչացումից փրկելու համար բազմիցս դիմել է համապատասխան պետական մարմիններին, սակայն՝ ապարդյուն:

Նշենք, որ Վանա լճի հյուսիսային ափին գտնվող Արծկե գավառը 19-րդ դարի երկրորդ կեսին ուներ մոտ 140 գյուղ՝ 30 000 բնակիչներով, որից 25 000-ը՝ հայեր: Արծկեի հայերն ունեցել են 30 եկեղեցի և 10-ից ավելի տարրական կրթարան։