Քաղաքական գործիչ՝ «վարձակալությամբ»

«Գիրչի» ուլտրալիբերալ կուսակցությունում որոշել են եկամուտ ստանալ վրացական ամանորյա ավանդույթից։ Կուսակցության ղեկավար Զուրաբ Ջափարիձեն մտադիր է այցելել հինգ ընտանիքներ, որոնք կվճարեն դրա համար՝ տեղեկացնում է «Նովոստի-Գրուզիան»։

Զուրաբ Ջափարիձեն պատրաստ է դառնալ «մեկվլե», ինչպես անվանում են առաջին հյուրին, ով տուն է գալիս Նոր տարուն։ Համարվում է, որ նրանից է կախված՝ երջանիկ կլինի արդյոք եկող տարին։

Ընտանիքները, որտեղ կհյուրընկալվի Ջափարիձեն, կմասնակցեն աճուրդին որը կտեւի մինչեւ դեկտեմբերի 31-ի 23։30-ը։

Տվյալ պահին առաջատար երեք ընտանիքները պատրաստ են իրենց տուն Ջափարիձեի այցի համար 111 լարի (40 դոլար), 100 լարի եւ 50 լարի վճարել։

Ամենափոքր խաղադրույքը 2 դոլար (մոտ 75 ցենտ) է։

Դեկտեմբերի 31-ի ժամը 23։45-ին կուսակցությունը կհայտնի երեք հաղթողներին, որոնց ընտանիքներում քաղաքական գործիչը կլինի գիշերվա ժամը մեկից մինչեւ հունվարի 1-ի առավոտյան ժամը չորսը։ Յուրաքանչյուր այց կտեւի առնվազն 35 րոպե։

Ընդ որում, աճուրդը կշարունակվի, որպեսզի ի հայտ գան եւս երկու հաղթողներ, ում տանը Ջափարիձեն կլինի առավոտյան ժամը 4-6-ը։

«Գիրչին» հստակեցրել է, որ Զուրաբ Ջափարիձեի «առաքումը» կկատարվի միայն Թբիլիսիի սահմաններում։

Ջափարիձեն մասնակցել է 2018թ․ նախագահական ընտրություններին՝ առաջին փուլում հավաքելով ընտրողների ձայների 2,26 տոկոսը։