Պուտինն Էրդողանի հետ քննարկել է Թուրքիային С-400 համակարգեր մատակարարելու հարցը

Ռուսաստանի Դաշնության նախագահ Վլադիմիր Պուտինը մարտին 10-ին Մոսկվայում կայացած հանդիպման ժամանակ իր թուրք գործընկեր Ռեջեփ Թայիփ Էրդողանի հետ քննարկել է Անկարային С-400 հակաօդային պաշտպանության համակարգերի մատակարարման հավանականությունը:

Ինչպես հայտնում է «Իզվեստիա»-ն, տեղեկությունը հաստատել է ՌԴ պաշտպանության նախարար Սերգեյ Շոյգուն:

Աղբյուրը մանրամասնում է, որ Էրդողանը հետաքրքրվածություն է դրսևորել այդ համակարգերի գնման հարցում և ներկայում գնահատում է հնարավոր պայմանագրի արժեքը:

Մինչդեռ Պուտինի խոսնակ Դմիտրի Պեսկովը պարբերականի հետ զրույցում մանրամասնել է, որ ռուսական կողմը դեմ չէ այս ոլորտում Թուրքիայի հետ համագործակցությանը:

«Կողմերը հետաքրքրված են ու կշարունակեն բանակցել»,-հավելել է Պեսկովը:

Ոլորտի փորձագետները նկատել են, որ համաձայնության գալու դեպքում սա կլինի Մոսկվայի և Անկարայի միջև ռազմատեխնիկական համագործակցության շրջանակում առաջին խոշոր պայմանագիրը:

Նշենք, որ С-400 զենիթահրթիռային համակարգը նախատեսված է կարևորագույն օբյեկտներն օդային հարվածներից արդյունավետ պաշտպանելու համար: