Վրաստանի խորհրդարանը հաստատել է մարիխուանայի օգտագործման մասին նախագիծը

Վրաստանի խորհրդարանը հաստատել է մարիխուանայի օգտագործման մասին նախագիծը, որի նախաձեռնողը Վրաստանի կառավարությունն է, հեղինակը՝ ՆԳ նախարարությունը՝ փոխանցում է Грузия-онлайн-ը։

Նախագծի համաձայն՝ մարիխուանայի օգտագործումը թույլատրելի է միայն անձնական տարածքում (եթե ֆիզիկական անձը/ ֆիզիկական անձի ընտանիքը ապրում է այդ բնակելի տարածքում, եւ այդ տարածքը միաժամանակ ձեռնարկատիրական գործունեության վայր չէ)։

Ըստ նախագծի՝ հասարակական ցանկացած վայրում, հասարակական տրանսպորտում, անչափահասի ներկայությամբ, ուսումնական հաստատությունում, ինչպես նաեւ դրանից որոշակի հեռավորությամբ մարիխուանա, ինչպես նաեւ ծխախոտ ծխելը կպատժվի։

Մարիխուանայի օգտագործումը մինչեւ 21 տարեկան անձի կողմից ցանկացած վայրում պատժելի է։ Դրա համար, նախագծի համաձայն, նախատեսվում է 500-1000 լարի տուգանք, կրկնվելու դեպքում՝ 1000-1500 լարի։

Մարիխուանայի ազդեցությամբ տրանսպորտային միջոց վարելը քրեորեն պատժելի արարք կհամարվի։