Օբաման օգնել է Գոհաբանության օրվա ընթրիք պատրաստել կարիքավորների համար (լուսանկարներ, տեսանյութեր)

Միացյալ Նահանգների նախկին նախագահ Բարաք Օբաման այցելել է սովի դեմ պայքարող Չիկագոյի Սննդի բանկ (Greater Chicago Food Depository), որտեղ օգնել է Գոհաբանության օրվան ընդառաջ տոնական ուտեստներ պատրաստել կարիքավորների համար:

Ինչպես նշում է Daily Mail-ը, ԱՄՆ պատմության մեջ առաջին սևամորթ նախագահի մասնակցությամբ ուշագրավ տեսանյութը հրապարակվել է The Obama Foundation հիմնադրամի թվիթերյան էջում՝ կարիքավորներին օգնելու կոչով:

Օբաման կոչ է արել բոլոր սրտացավ մարդկանց Գոհաբանության տոնին ընդառաջ բարի գործ անել ու օգնել նրանց, ովքեր հնարավորություն չունեն տոնական սեղանի շուրջ նստել:

Աղբյուրը մանրամասնում է, որ 2017թ. ԱՄՆ-ում արձանագրվել է սննդի համար բավարար գումար չունեցող ընտանիքների թվի աճ: Վիճակագրական տվյալները փաստում են, որ բավականաչափ սնունդ գնելու խնդիրն առավել սուր է Միսիսիպի նահանգում, որտեղ յուրաքանչյուր 5 ընտանիքից մեկը բախվում է այդ խնդրին: