Անկարգություններ Բաթումիում. 30-ից ավելի տուժածներ կան (ֆոտո)

Վրաստանում ոստիկանությունն ու հատուկջոկատայինները կիրակի լուսաբացին ամբողջությամբ մաքրել են Բաթումիի Ճավճավաձեի փողոցը ցուցարարներից, որոնք գիշերն անկարգություններ էին հրահրել, հաղորդում է Sputnik-Գրուզիան:

Փողոցների մաքրումն անցել է առանց լուրջ բախումների, արմատական երիտասարդները, որոնք մի ժամ ջարդարաությամբ էին զբաղված, հեռացել են ոստիկաններին տեսնելուն պես: Ցուցարարների մնացորդներին ոստիկանները հեռացրել են քաղաքի ոստիկանատան տարածքից՝ ռետինե գնդակներ կիրառելով: Դեպքի վայր ոստիկանների եւ հրշեջների մեծ խմբեր են բերվել: Քաղաքում անկարգությունների մասնակիցներին ձերբակալելու գործողություն է ընթանում: Ձերբակալվածների էիվը դեռ հայտնի չէ:

Քաղաքապետ Գեորգի Երմակովը հայտարարել է, թե կոմունալ ծառայությունները բերվել են պատրաստության վիճակի: Առաջիկա ժամերին Բաթումիի քաղաքապետարանը կպարզի վնասի չափը: Իրադարձությունների էպիկենտրոնում հայտնված Ճավճավաձե փողոցում վնասվել են մայթերը, կոտրված են ցուցափեղկերը, ոչնչացվել են ցանկապատերը, չեն աշխատում լուսացույցները: Փողոցում բազմաթիվ այրված մեքենաներ կան:

Իրավիճակը Բաթումիում սրվել է, երբ շաբաթ երեկոյան ոստիկանները տուգանք են գրել քաղաքի կենտրոնում ապօրինի կայանման համար: Վարորդը դրա հետ չի համաձայնվել եւ վիճաբանություն է սկսվել: Վեց մարդ ձերբակալվել է, դրանից հետո մեկ ժամվա ընթացքում հարյուրավոր մարդիկդուրս են եկել փողոց՝ պահանջելով ոստիկանապետի հրաժարականը: Ինքնաբուխ ակցիան վերաճել է փողոցային անկարգությունների: Ցուցարարները այրել են մեքենաները, հրանյութեր պայթեցրել, արգելափակել տեղական ոստիկանության շենքը:

Վրաստանի վարչապետ Գեորգի Կվիրիկաշվիլին հայտարարել է, թե «ապակառուցողական արմատական ուժերը» օգտագործել են կենցաղային միջադեպը իրավիճակի սրման համար: Նա, սակայն, որեւէ անուն չի տվել: Նախնական տվյալներով, Բաթումիում տեղի ունեցածի հետեւանքով վիրավորվել է 30-ից ավելի մարդ:

news.am